Ir davent sco giuvenils per scolaziun e furmaziun e lura turnar cun famiglia puspè en l'Engiadina. Quest giavisch han bleras giuvnas Engiadinaisas e giuvens Engiadinais. Uschia er ils trais frars Florinett da Scuol ch'èn tuts turnads cun lur famiglias en l'Engiadina Bassa.
«Fiss i pussaivel per tai da viver ina giada en l'Engiadina?», ha dumandà Andrea Florinett da Scuol cura ch'el ha emprendì d'enconuscher lezza giada sia amia ch'è ussa era sia dunna. El ha adina gì encreschadetgna per l'Engiadina Bassa ed uschia èsi adina stà evident per el da bandunar l'Engiadina per scolaziun, ma era da vulair turnar ina giada cun sia famiglia.
Jau hai spetgà il dretg mument per turnar cun la famiglia en l'Engiadina.
En duas etappas è el stà en tut 10 onns giu la Bassa, entamez è el turnà in temp a chasa per far sport da professiun. Ussa viva el dapi 10 onns cun sia famiglia e ses dus uffants a Scuol. «Jau hai spetgà il dretg mument per turnar cun la famiglia en l'Engiadina», raquinta Andrea Florinett. E cura che l'occasiun è sa dada, saja tut ì magari svelt, declera el.
Il giavisch da turnar insacura
Er ils dus frars pli giuvens dad Andrea Florinett, numnadamain Adrian e Roman Florinett, han bandunà l'Engiadina per scolaziuns. Els vivevan l'emprim schizunt ensemen en ina cuminanza d'abitar a Turitg. Sche pussaivel turnavan els la fin d'emna en l'Engiadina u per far sport u lura per ir a chatscha en Val S-charl. Era per els era pli u main evident da vulair turnar insacura – il pli tard cun la famiglia ed avant ch'ils uffants van a scola – puspè en l'Engiadina.
La gronda sfida era da chattar ina buna plazza da lavur e natiralmain er in'abitaziun. Adrian Florinett è lura era stà l'emprim dals frars Florinett ch'è turnà en patria.
Jau hai tschertgà var dus onns ina plazza da lavur adattada.
Che las bunas plazzas per quels che hajan veglia da turnar sajan raras, declera el. Dal 2015 èsi lura stà uschè enavant. «L'emprim aveva bunamain in pau scuidanza che mes frar Adrian ha pudì turnar a Scuol», di Andrea Florinett. Ma era tar el e sia famiglia èsi lura ì svelt. Tuts dus èn turnads suenter 10 onns a l'ester, respectivamain giu la Bassa.
Vivì 17 onns a Turitg
Il pli ditg ha tegnì ora Roman Florinett da tschella vart dal Pass dal Flüela. El ha vivì 17 onns a Turitg e conturns ed ha fatg carriera sin banca. Ma cun famiglia è creschì era tar el il giavisch da turnar, tant pli ch'era sia dunna ha ragischs en l'Engiadina Bassa, era sch'ella è creschida si en in auter chantun da la Svizra. «Jau aveva ina fitg buna plazza giu la Bassa», raquinta el.
En l'Engiadina ha el pudì definir sez – ensemen cun il cussegl administrativ e la direcziun da la banca – il cuntegn e las circumstanzas da sia plazza da lavur. Che senza famiglia fiss el pli che facil restà giu la Bassa, declera el. Ch'el haja gì ina gronda rait da contacts da lavur e che quai al manca schon in pau da far giu la saira cun in collega per ina biera e pudair discurrer sur dal mund da daners e finanzas. «Ti has gist survegnì anc la storta», di Andrea Florinett a ses frar il pli giuven che viva ussa dapi trais onns en l'Engiadina Bassa.
Qualitad da vita attractiva
Ma tge è lura propi questa magia da turnar a viver en l'Engiadina? Èsi propi l'emprim dad ir davent, per vesair la bellezza da la patria? «La qualitad da vita en l'Engiadina è enorma», resumescha Andrea Florinett. Da pudair ir or da chasa ed esser amez la natira cun tut sias pussaivladads da far sport, è per el in grond avantatg.
«E lura vegn tiers anc tut l'infrastructura a Scuol: Nus pudain ir cun skis e far passlung, pudain giugar hockey en ina halla, avain differentas pussaivladads per nudar e far wellness. Quai n'exista betg giu la Bassa uschè concentrà en in lieu», agiunta Roman Florinett.
Sco ch'Adrian Florinett raquinta, as stoppia giu la Bassa adina viandar l'emprim in toc per trair a niz las differentas purschidas da sport e temp liber. A Scuol cuntansch'ins tut cun il velo u a pe.
Qua pon ins laschar ir ils uffants or da chasa senza stuair adina controllar nua ch'els èn, tge ch'els fan e cun tgi ch'els discurran.
El giauda era da pudair turnar a chasa a mezdi e pudair mangiar gentar cun la famiglia. «Quai n'era betg pussaivel giu la Bassa», declera el.
«Nus stuain appreziar quai che nus avain», di Andrea Florinett. El menziuna era che a Scuol èn las famiglias dals trais frars fitg datiers als geniturs: «Tatta e tat han plaschair che nus essan qua ed els han adina temp per nus e guardan savens da tut ils tschintg uffants.»
Ma datti lura insumma insatge che als manca en l'Engiadina? «Forsa era la pussaivladad da pudair ir mintga di a chatscha», raquinta Roman Florinett. Ch'el giudeva fitg la pussaivladad da pudair ir svelt sur cunfin a chatscha. «Ma il rest da la Svizra n'è betg or dal mund», di Andrea Florinett.
Ch'els hajan blera parentella giu la Bassa e che perquai hajan els la pussaivladad da passentar cura ch'els vulan ina fin d'emna ordaifer l'Engiadina. «En citad è però tut pli svelt ed agità, uschia che nus turnain adina puspè gugent a chasa», agiunta Adrian Florinett.
Per Roman Florinett eran era las pussaivladads d'atgna proprietad d'abitar in argument per turnar en patria. Che en l'Engiadina Bassa sajan questas pussaivladads adina anc meglras che en vischinanza da Turitg.
Ir a chatscha ensemen en Val S-charl
Ed apropos chatscha: Ils trais frars Florinett èn natiralmain era chatschaders. Il temp da chatscha passentan els ensemen en Val S-charl. «En chamona avain nus plazza per tut la cumpagnia», di Adrian Florinett ed agiunta, che quai sajan adina bels muments er ensemen cun ils uffants. Che uschiglio, durant l'onn, na saja il contact betg uschè enorm, auter che tar las festas da famiglia. Adrian e Roman Florinett giogan ensemen hockey tar ils seniors dal CdH Engiadina. E mintgatant fan Andrea ed Adrian ina tura cun il bike cun lur uffants.
En l'Engiadina Bassa han ils trais frars Florinett era blers amis e collegas ch'èn dal rest era turnads cun famiglias en l'Engiadina. E che qua as enconuschia simplamain mintgin. «Quai n'è betg adina be in avantatg», di Roman Florinett cun in surrir.
Uschia sa mintgin precis tge che l'auter fa.
El vesa era tscherts avantatgs en l'anonimitad giu la Bassa. Ses frar Adrian Florinett percunter cuntradi: «A Turitg è ins be in numer. Nus na enconuschevan gnanca tut noss vischins en chasa», declera el. El vesa plitost il martgà da lavur sco avantatg en il rest dal territori svizzer: «En l'Engiadina èn las bunas plazzas da lavur limitadas, giu la Bassa han ins en mintga cas dapli pussaivladads.» Che era la paja saja giu Turitg natiralmain pli auta, di el cun persvasiun. Per tuts trais haja la qualitad da vita en l'Engiadina dapli valur ch'il salari.