Las votantas ed ils votants da l'Engiadin'Ota han ditg Gea ad omadus projects da votaziun davart la renovaziun da la plazza aviatica regiunala a Samedan. Quai scriva la INFRA eroport regiunal Samedan. Uschia possian vegnir cumenzadas las lavurs da renovaziun da l'infrastructura da la plazza aviatica.
In pass vinavant ma anc betg sur la lingia d'arriv
Cun ils dus Gea dals votants e las votantas da la regiun Malögia areguard la sanaziun da la plazza aviatica a Samedan, è il project uss in grond pass vinavant.
Nus guardain uss per la finanziaziun cun chantun, Confederaziun e bancas. Era lavurain nus vinavant per inoltrar la dumonda da construcziun.
Per pudair trair in stritg final sut las turbulenzas fin ussa, ha il suveran decis cun 74% Gea dad abolir sia decisiun dal 2017 ed usche pudair cumenzar in nov chapitel en la renovaziun da la plazza aviatica.
Tar la dumonda da finanziar il project èsi stà pli stretg. Cun in resultat total da 2'443 Gea cunter 2'051 Na èn 54% da las votantas e dals votants s'exprimids a favur las contribuziuns finanzialas da las vischnancas purtadras. Il project duai custar bun 68 milliuns francs per ils novs edifizis da la gestiun. Il maun public surpiglia cun quest resultat a l'urna credits da 58 milliuns francs.
Enta pes stat uss pero anc in recurs areguard la votaziun, ch'in votant aveva inoltrà avant duas emnas. Co vinavant cun quel, ston decider las dretgiras.
Pero duain nus per il mument spetgar sin la decisiun da la dretgira chantunala en connex cun il recurs ch'igl ha dà cunter questa votaziun.
Grondas differenzas tar las vischnancas
Nagin dubi hai dà tar la decisiun d'abolir la votaziun dal 2017. Tut las vischnancas èn s'exprimidas cleramain persuenter. Auter vesa la situaziun ora tar la finanziaziun dal project actual. Entant che la populaziun da San Murezzan e Celerina è s'exprimida cleramain per il project cun passa 65% Gea, èn 6 da las 11 vischnancas s'exprimidas encunter il project. En egl croda qua cunzunt S-chanf cun ina cumpart da bunamain 70% Na.
11-08-2025
Discussiuns ed in recurs fatschentan vinavant la plazza aviatica
Las 11 vischnancas da l'Engiadin'Ota han da decider ils 17 d'avust davart l'avegnir da l'eroport da Samedan – i va per il nov project da renovaziun e sia finanziaziun. La conferenza da l'eroport ha deliberà ils 2 da fanadur il messadi da votaziun final per il project. Quel cuntegna intgins augments e precisaziuns cumpareglià cun l'emprima versiun deliberada mez avrigl.
Il messadi cuntegna duas dumondas. L'emprim sto il suveran abolir la votaziun dal mars 2017 per investiziuns en l'infrastructura da l'eroport. Lura vai era per conceder in credit d'impegn da 38 milliuns francs e da surpigliar la responsabladad per emprests da terzs da total 20 milliuns francs.
San Murezzan che profitescha ordvart da l'eroport da Samedan ha approvà la fin da zercladur 2025 cleramain ina contribuziun speziala da 5 milliuns francs.
La conferenza da l'eroport discurra cun deliberar il messadi d'in pass impurtant per renovar l'eroport regiunal a Samedan. Dapi dus onns vegnan fatgas preparativas en quest connex. Sper il messadi da votaziun ha la Conferenza da l'eroport approvà il quint annual, il rapport da gestiun ed il rapport d'indemnisaziuns dal 2024.
Vinavant vuschs criticas ed in recurs
Durant ina discussiun publica ils 5 d'avust hai sa mussà ch'i dat intginas vuschs criticas. A blers steva sin il magun tut l'istorgia precendenta (dapli giusut en la box «Il crap da stgarpitsch»). La critica è surtut ida en direcziun da las persunas responsablas da l'INFRA e da la Conferenza da la plazza d'aviatica. Ellas hajan negligì lur incumbensa da controlla e cun quai derasà disfidanza. Plinavant datti critica envers l'emprima dumonda dad abolir la votaziun dal 2017.
Plinavant ha Cornel Widmer, commember da la cumissiun sindicatoria da l'INFRA, annunzià d'avair mess sin via in recurs pertutgant il dretg da vuschar. El metta en dumonda la missiva che na saja betg adequata e na cuntegnia betg las infurmaziuns per ch'in e mintgina possia decider infurmà, cun arguments pro e contra. Cura che quel vegn prendì per mauns dal tribunal chantunal, n'è betg cler. Il recurs signifitga tenor Mario Cavigelli, il president da la cumissiun administrativa, en mintga cass in retard dal project.
Raportaziun da radio da l'occurrenza dals 5 d'avust
Renovaziun en trais etappas
Il project da renovar sa cumpona da pliras etappas. En in'emprima etappa vegn la Rega a construir il heliport per tut las trais interpresas da helicopter a Samedan, quai enfin la fin 2026. En la segunda etappa enfin il 2031 è planisà da renovar las construcziuns autas da la plazza aviatica sco er ulteriura infrastructura (edifizis, hallas da vehichels etc). En in'ulteriura etappa è planisada da engrondir la plazza da preparaziun da partenza e la sanaziun da la pista. Quest pass è previs suenter l'onn 2031 e vegn a custar 12 milliuns francs. Tgi che surpiglia quels custs, saja anc avert, i dettia pliras opziuns.
Dapli davart las entschattas e las etappas da l'eroport: