Passa 30 onns n'èsi betg pli stà pussibel da sunar tut ils quatter zains dal clutger San Luzzi a Zuoz. Quai pervia dal privel ch'il clutger avess pudì ir en muschna. Il clutger dal 12avel tschientaner sbalunziava fin 65cm vi e nà durant la sunasontga, pia cura che tut ils zains sunavan ensemen. Ina novaziun mundiala ha ussa manà remedi.
Passa dus onns ditg è Christian Ferrari, suprastant communal da Zuoz, gia vi da realisar ina soluziun cun l’affar Muff, ch'è spezialisà sin la tecnica da clutgers.
Il clutger sa muveva fin 65cm vi e nà. Qua tschiffavan ins tema. Sche nus n'avessan betg reagì fiss il clutger crudà ensemen.
-
Bild 1 von 3. Christian Ferrari, suprastant da Zuoz. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
La soluziun èn cunterpais, vul dir: pais che sbalunzian al cuntrari dals zains uschia che las forzas sa neutraliseschan. Il problem cun cunterpais è ch'ils zains sa movan pli plaun e ch'il tun tipic dal clutger sa mida – quai causa ch'il zain e collià sin il pais. Sco novum mundial ha l’affar Muff sviluppà in sistem che timunescha ils cunterpais senza influenzar ils zains sez.
Sper quai hajan ins era fatg midadas vi da la sutga dal zain e vi dals battagls. Il resultat saja impressiunant, dian ils experts:
El resuna pli fin, ma ha ina fitg bella resonanza. La populaziun da Zuoz n'auda betg pli ils zains en chasa. Uss avain puspè il tun oriund.
-
Bild 1 von 3. Thomas Muff, spezialist tecnica da clutger. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
Cun questas mesiras pon ins uss danovamain sunar tut ils zains ensemen, tut senza privel. Anzi, ins pudess schizunt installar anc in tschintgavel zain sch'insatgi vuless donar in, di Christian Ferrari cun in surrir en fatscha.