Ils 24 da december 2025 han ils zains da la baselgia parochiala s. Gions a Mustér clamà parochianas e parochians al servetsch divin da vigilgia Nadal. Curt avant il servetsch divin a las 17:00 n'è il zain grond betg pli stà d’udir. Il motiv: Il battagl è rut permez e crudà. La part dal battagl cun la rucla cun ina paisa tranter 80 e 100 kilograms ha perfurà dus palantschieus da lain en l clutger ed è sa fermà en ils quaders d’in terz palantschieu.
Il motiv è enconuschent
«Ils 6 da schaner 2026 èn represchentants da l’interpresa Muribär da Büron stads tar nus ed han intercurrì il battagl. Igl è sa mussà che quel aveva ina micro-ruttadira che n’era betg stada vesaivla avant l'incaps», di Gion Tenner ch’è responsabel per las immobiglias da la Plaiv s. Gions Mustér. Dal battagl rut èn las mesiras vegnidas pridas sco era la dimensiun dal zain grond.
Sin il pli tard da Pasca quintain ch’il zain grond possia puspè resunar.
«Las proximas emnas vegn il battagl nov producì da l’interpresa Wensauer. Il termin da furniziun cuzza tranter sis ed otg emnas. Sin il pli tard da Pasca quintain dentant ch’il battagl saja montà ed il zain grond possia puspè resunar», di Gion Tenner. Il battagl nov è calculà cun custs da radund 7'600 francs. Proximamain duain er ils plantschieus donnegiads vegnir reparads.
Interpresa specialisada
L’interpresa Wensauer, cun sedias a Passau e Regensburg en Germania, è ina da las grondas ed enconuschentas che producescha battagls en l’Europa. Ella fa quai era per differentas interpresas svizras sco per exempel Muribär. Sco ins po leger sin la homepage da Wensauer, construescha ella mintg’onn radund 1'500 battagls pli gronds e pli pitschens.
Da preschent è ella vi da la construcziun da trais battagls per ina baselgia en Finlanda ed er ils battagls da fier dals zains da Nôtre Dame a Paris èn ord lur luvratori. Producids vegnan ils battagls anc adina tenor il mastergn tradiziunal cun mazza e martials mecanics. Battagls construids da Wensauer pon avair paisas d'enfin 660 kilograms per zains per part da 18 tonnas.
Il zain è arrivà 1916
L'onn 1916 è il zain grond da la baselgia parochiala s. Gions a Mustér arrivà a Mustér. D’uffants e giuventetgna, ma era d’umens creschids, è el vegnì tratg davent da la staziun da viafier fin sper il clutger, nua ch’el è la fin finala vegnì auzà sin clutger. «Ils zains da la baselgia parochiala èn vegnids construids da sias uras da l’interpresa Monzini dal l’Italia», di Gion Tenner.