Festival da nozzas a Rehanau - Per il di da nozzas e quasi tut pussibel

Passa 30 exposituras ed expositurs han preschentà lur products e servetschs en ed ordvart il Chastè Rehanau. La è per l'emprima giada vegnì organisà il festival da nozzas grischun. Las portas èn stadas avertas per in e scadina ch'ha vulì laschar s'inspirar da la purschida da cusunzas, floristas, fotografs, bands, aureras, coiffeusas e planisadras da nozzas. Sper quai han ins era pudì empruvar pettas, guardar in defilé da moda u laschar far fotografias. Igl è schizunt vegnì organisà diversas ceremonias per ch'ins po s'imaginar co l'atgna nozza pudess vesair ora.

Tranter las visitadras ed ils visitaders han era intginas rumantschas e rumantschs preschentà lur lavur. Uschia per exempel Anna Laura Klucker che creescha e cusa tranter auter vestgids da nozzas che crodan en egl cun lur simpladad ed il pitg da crusch grischun. Cun 12 onns ha ella cusì ses emprim vestgì ed ussa cun 30 onns posseda ella ses agen label da moda cul num «Yuli».

Ma tge fiss ina nozza senza decoraziun? Per Gina Spreiter ina chaussa nunimaginabla. Ella è sia partenaria da fatschenta preschentan lur decoraziuns da fluras e cusseglian pèrins interessads. Per gronda part fetschian ellas la decoraziun da nozzas per persunas da la Bassa che maridan en la regiun. Savens sajan questas nozzas in zic pli pompusas che quellas dals indigens e da las indigenas, manegia la florista da professiun.

Organisar nozzas saja blera lavur, di Olivia Derungs ch'è planisadra dad events professiunala. Bleras persunas na veglian betg stuair s'occupar persulas da tut las incumbensas e perquai sajan ella e sias collavuraturas dad “Eventfieber” qua. Lur lavurs tanschan davent la tschertga da la localitad enfin tar la decoraziun, il program e giavischs individuals. Mintga nozza saja fitg individuala e mintgatant dettia giavischs fitg particulars:

Era sche la branscha da nozzas vegn savens dominada da dunnas datti era in ni l'auter um dal fatg. Era sch'ils transports da nozzas èn mo ina part da sia lavur, sajan quellas occurrenzas insatge spezial per el, di Andrea Gaudenz. El posseda quatter autos da posta antics ed in da quels – il FBW C40U – è responsabel per il transport dals visitaders e da las visitadras davent da la staziun da tren da Rehanau enfin tar il chastè.