Star Wars tutga tar ils films ils pli populars. Ina raschun per quai è era la musica impressiunanta. Precis questa musica ch'è vegnida cumponida dal cumponist John Williams, interpretescha la Kammerphilharmonie la proxima stad en la curt dal chastè da Haldenstein. Dasper la musica da Star Wars vegn il public la medema saira er anc a sentir la suita «Die Planeten» dal cumponist Gustav Holst.
Gustav Holst ha inspirà il cumponist James Williams, e perquai ha el suenter cumponì la musica da Star Wars. Lur ovras van bain ensemen cunquai che tuttas duas ovras giogan en l'univers.
Tar il segund punct da program «Symphonic Pops» preschenta la Kammerphilharmonie chanzuns da pop e rock dals ultims 60 onns. Tranter auter chanzuns da Marvin Gaye, Whitney Houston, Queen, ma er Adele. Interpretà vegnan quellas chanzuns dals dus chantadurs Emanuel Heitz e Fabienne Louves. Els chantan ensemen ma era sco solists.
Insatge è nov al festival
Quest onn na vegni betg a dar mo concerts. Da nov vegn la musica er accumpagnada dad installaziuns immersivas da video e glisch. Questas projecziuns rinforzan l'effect emoziunal da la musica.
Tar l'emprim punct da program «Star Wars und Planeten» datti per exempel visualisaziuns da stailas, planets e cuntradas galacticas. Tar il segund punct dal program «Symphonic Pops» datti in spectacul da glischs da colurs e musters.
Cun il program dal festival, in program plitost modern, vulan las responsablas ed ils responsabels da la Kammerphilharmonie agiunscher in public pli giuven.
Ins avess sentì ch'il public era sco savens en la branscha da la cultura, plitost glieud pli veglia e quai vuless ins midar cun il nov program dal festival.
Per tschiffar in public uschè vast sco pussibel datti sper ils concerts en la curt da Haldenstein er anc in public viewing gratuit sin il Kornplatz a Cuira.
