La FHGR ha ina clera finamira - ella vul gudagnar dapli persunal per la tgira tras ina scolaziun pli attractiva. Per cuntanscher quai ston ins motivar differentas persunas cun differentas furmaziuns professiunalas.
Il studi è ina cooperaziun cun la ZHAW, la Scola auta turitgaisa per scienza applitgada. Quella porscha numnadamain gia in tal studi. L'idea saja ch'ils students absolvan ils praticums en interpresas grischunas durant che la part teoretica ha lieu a Turitg.
Cun questa purschida na vegnin nus betg a pudair schliar cumplettamain la mancanza da persunal en il sectur da la sanadad, quai è cler.
Pertge dovri il nov studi da la FHGR?
Ina sumeglianta spierta d'in studi datti però gia en il Center da furmaziun per la sanadad e fatgs socials grischun, curt Bgs. Là pon persunas, suenter in giarsunadi en la tgira, far in certificat professiunal. Era durant quest studi absolvan ils students e las studentas differents praticums en interpresas grischunas.
-
Bild 1 von 2. Il directur da la Bgs, Daniel Ammann. Bildquelle: RTR.
-
Bild 2 von 2. Il directur da la FHGR, Gian Paolo Curcio. Bildquelle: FHGR.
La differenza è pia cunzunt en la via professiunala. Entant ch'il Bgs s'orientescha fermamain a la pratica e sa drizza a persunas che han fatg in giarsunadi, è il studi da la FHGR plitost per persunas cun ina matura u ina maturitad professiunala ed ha il focus era anc pli ferm sin la teoria e la perscrutaziun.
A prima vista èn las duas spiertas fitg sumegliantas. Tuttina na vesan ni la FHGR ni il Bgs ina concurrenza. Nus adressain autras persunas, di Gian Paolo Curcio da la FHGR. Per el è cler, i saja nagina concurrenza, mabain ina cumplettaziun. Era il directur dal Bgs Daniel Ammann sustegna il nov studi. Enfin ussa han bleras persunas stuì bandunar il chantun Grischun per far in studi da tgira.
Il bachelor da la FHGR serra ina fora en la purschida dal Grischun. Differentas furmaziuns rinforzan ord nossa vista l'attractivitad e la perspectiva da svilup da la professiun.
Ina sfida pudessan dentant esser las plazzas da praticums, di il directur dal Bgs Daniel Ammann. Ma era qua è il directur da la FHGR calm. Actualmain dettia avunda plazzas da praticums en il Grischun.
Sch'i fissan memia bleras plazzas da praticum, avessan nus bunamain in problem da luxus.
A lunga vista è era planisada ina collavuraziun tranter las scolas, per exempel tar furmaziuns supplementaras u tar projects communabels. Decisiuns concretas na datti dentant anc betg.
Cler è - Il nov studi da la FHGR sulet na vegn betg a schliar la mancanza da persunal da tgira. Tuttina duai quai esser in pass impurtant per motivar dapli persunas per la professiun da tgira. I detta actualmain ses interessents ed interessentas per il studi e la FHGR quinta da cumenzar la prima ediziun dal studi in collavuraziun cun la ZHAW cun ina fin dus persunas.