Flem tutga tar las vischnancas grondas dal Grischun cun in'economia ferma e projects interessants en in'impurtanta regiun turistica. E tuttina: Gia dapi la fin da favrer tschertga Flem ina chanzlista u in chanzlist per lur vischnanca. Ussa è la plazza perfin vegnida publitgada per la segunda giada.
Tenor il president communal Christoph Schmidt na saja dentant betg il cas ch'ins n'haja gì naginas annunzias en l'emprima runda. Els hajan gì in candidat empermettent che saja dentant sa retratg l'ultim mument.
Recrutar danovamain
La vischnanca è sa decidida da far ina segunda runda da recrutaziun. Quai principalmain perquai ch'il chanzlist actual, Martin Kuratli, sa gidass anc in pèr mais pli ditg sche quai fissi lura necessari. El giess gugent en pensiun sin la fin da l'onn – suenter 37 onns en uffizi.
Per la segund'emprova ha in team che consista dal chanzlist actual, d'in cussegliader da cultura, d'il president da vischnanca e d'in ulteriur suprastant elavurà intginas adattaziuns per il process da recrutaziun.
- Publitgà l'annunzia haja la vischnanca quella giada sin dapli plattafurmas ed era en magazins spezialisads.
- L'inserat è vegnì elavurà cun descriver pli en detagl las pretensiuns ch'il post tira cun sai ed era cun integrar il profil che giess bain a prà cun la vischnanca e las collavuraturas ed ils collavuraturs che lavuran uss gia en l'administraziun.
- Candidatas u candidats qualifitgads èn vegnids pledentads en in discurs direct per far attent sin la plazza libra e l'inserat.
Sch'ins scriva ora ina plazza tal captivanta dependi natiralmain sin tge chanal ch'ins fa quai. Tar l'emprima publicaziun avain nus procedì en moda classica: Sin nossa pagina-web ed er cun inserats online.
Era sche la vischnanca saja per il mument anc entamez il process da recrutaziun, haja gia dà annunzias empermettentas.
En il decurs da l'entschatta dal 2027 vegnin nus segir ad avair ina soluziun. I dependa lura anc quant ditg che la persuna è obligada u betg. Ma jau crai che nus chattain ad uras la persuna adattada.
Quai tradescha Christoph Schmidt cun in surrir e di ch'el haja buna speranza da chattar la persuna adattada per il post da la chanzlista u dal chanzlist per Flem.