Musica collia – quai è il motto da l’Associaziun da las scolas da chant e musica dal Grischun ACMG. Sco ella scriva en ina communicaziun, duai l’inscunter esser ina nova plattafurma che promova il barat, la rait e la percepziun publica da las scolas da musica da l'entir chantun.
Ils organisaturs han spetgà a l'inscunter var 220 persunas d'instrucziun sco er mainascolas, delegads e giasts da la politica, da l'economia e da la societad. «Nossa finamira è da rinforzar la conscienza per l'impurtanza da la furmaziun musicala – en il mund professiunal tant sco en la vasta publicitad», declera Patric Vincenz, president da l'ACMG. L'associaziun cumpiglia actualmain 17 scolas da chant e da musica en il chantun.
Vast program
Il program dal di ha cumenzà cun in'avertura musicala e cun salids dal minister da cultura ed educaziun Jon Domenic Parolini e da Philippe Krüttli, president da l'Associaziun da las scolas da musica svizras. Il suentermezdi hai dà forums professiunals e lavuratoris. Il punct culminant da l'inscunter è stà il referat da la pedagoga da musica enconuschenta Kristin Thielemann davart il tema «Motivaziun pedagogia da musica – Co che scolas da musica promovan cumpetenzas centralas da damaun».
Co pon ins motivar scolaras e scolars?
Cun quella dumonda sa fatschenta la musicista, pedagoga ed autura tudestga Kristin Thielemann gia dapi onns. Ella viva dapi 17 onns cun sia famiglia en il chantun Turgovia è da l'opiniun che anc pli impurtant che motivar ils uffants, saja dad accumpagnar els e demussar tge pussaivladads ch'els hajan insumma cun far musica:
Tgi che less prestaziun sto porscher in’intenziun per il giuven visavi che na ha forsa anc mai vis insatgi sin tribuna.
E mintgatant muntia accumpagnar era da far in punct sche l’uffant na saja per in lung temp betg motivà. Quai era sch'ils geniturs avessan gugent che l’uffant cuntinuassi d'emprender l’instrument.
Il tema motivaziun vegnia er en l'avegnir ad esser actual, da quai è Kristin Thielemann persvasa e menziuna en quest connex l'intelligenza artifiziala. Era sch’i è gia ussa pussibel da far musica cun IA, emprendian ils uffants en l’instrucziun da musica anc bler dapli: pazienza, perseveranza ed autras valurs ch'in scolast u ina scolasta possia dar enavant bler meglier ch'ina intelligenza artifiziala.
Tge fan scolastas e scolasts da musica per mantegnair la motivaziun?
-
Bild 1 von 3. Barbara Jacomet-Candinas è dapi passa 30 onns scolasta da clavazin a la Scola da musica Surselva a Glion. Per ella èsi impurtant dad avair ina buna relaziun cun ils uffants. Ed era ils concerts èn adina puspè ina pussaivladad da motivar quels. Bildquelle: RTR.
-
Bild 2 von 3. Era Claudio Steier instruescha gia dapi 44 onns clavazin ed orgla, e vitiers è el il manader da la Scola da musica Grischun Central. Per el è la regularitad in impurtant punct. Dapli ch'ils uffants pon trenar e pli motivads ch'els èn. Bildquelle: RTR.
-
Bild 3 von 3. Sidonia Caviezel lavura tar la Scola da musica Engiadina Bassa/Val Müstair sco scolasta d'accordeon ed orgelin. Dasperas maina ella il chor da giuvenils da la regiun. Ella emprova da transmetter il plaschair per la musica – ed è da l'opiniun ch'ils uffants n'èn betg pli pauc motivads che pli baud, malgrà che la purschida è pli gronda. Bildquelle: RTR.
Inscunter annual è la finamira
L'onn proxim vegn il di chantunal da scola da musica ad avair lieu ils 22 d'avust 2026. Cun il lieu d'occurrenza a Landquart che è situà en il center e cun l'infrastructura professiunala stgaffescha la ACMG in format persistent per rinforzar ils fatgs da la scola da musica en il chantun. La participaziun è gratuita per tut las persunas envidadas. Ils custs da var 39'000 francs vegnan surpigliads da l'uniun ensemen cun las scolas da musica associadas.