L’associaziun da la branscha Swissolar prognostitgescha per quest onn per l'emprima giada dapi il 2017 ina reducziun da l'installaziun da novs moduls solars. La branscha quinta cun ina reducziun da la dumonda da 10-15%, ha ditg David Stickelberger, il vicedirectur da Swissolar.
Hassler Energia s'accorscha la digren
La Hassler Alternativa Energia SA da Ziràn, in pionier da la branscha solara, senta cleramain quest svilup. Entant che l'interpresa ha installà ils ultims onns fin a 150 indrizs solars per onn, quinta ella per l'onn proxim mo anc cun 120 indrizs. Quest svilup ha era consequenzas per il persunal.
Nus avain stuì relaschar glieud, perquai che la prevista n'è propi betg uschè buna.
Christ Andri Hassler, il manader da l'interpresa, declera che la prevista per il proxim onn n'è betg buna, perquai hajan er els stuì relaschar persunal. Uschia haja l’interpresa l’auter onn mo pli 25 emploiadas ed emploiads, quest onn sajan quai anc 30 persunas.
Ovras atomaras irriteschan
Hassler vesa differents motivs per la reducziun: «Ina raschun principala è il signal da Berna che vegn ussa cun l’idea da fabritgar novas ovras atomaras, quai chaschuna in pau malsegirezza.»
-
Bild 1 von 2. Discussiun da podium manà da Remi Crameri (da san.), cun Kevin Russi, expert da taglias, Carmelia Maissen, cussegliera guvernativa, Christ Andri Hassler, mainafatschenta Hassler Energia, David Stickelberger, vicedirectur Swissolar. Bildquelle: RTR.
-
Bild 2 von 2. Christ Andri Hassler ha surpiglià l'affar da ses bab Christian che vala sco piunier en la branscha solara grischuna. Bildquelle: RTR.
Malgrà las sfidas actualas resta l'interpresa fidaivla a ses spiert da pionier. Suenter 40 onns en la branscha, sa concentrescha Hassler Energia vinavant cumplettamain sin la forza dal sulegl e vul far quai era en l'avegnir.