La radunanza communala da la vischnanca Albula/Alvra ha approvà cun 43 tar 0 vuschs in credit da radund 7 milliuns francs, per renovar la staziun da Casti.
Nova staziun per radund 42 milliuns francs
A la staziun da Casti dovri renovaziuns cumplessivas. Ils motivs per quai èn las pretensiuns legalas da la lescha davart l'egualitad da persunas cun impediments sco er las meglieraziuns da la situaziun da midar tren actuala ch'è per part malsegira. Quai ha la vischnanca descrit uschia en il messadi per la radunanza communala.
Er per ils autos da posta dovri perruns senza barrieras e spazi supplementar per novas colliaziuns – perquai sto il terminal d'autos da posta vegnir bajegià ora. La vischnanca d'Alvra è responsabla per l'infrastructura dal manaschi d'autos da posta.
-
Bild 1 von 3. Bildquelle: vischnanca d'Alvra.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
L'engrondiment da la staziun che vegn planisà communablamain da la Viafier retica e da la vischnanca duai vegnir realisà tranter ils onns 2027 e 2030. Il project cumpiglia:
- renovaziun e cumplettaziun dals binaris
- dus perruns novs da 300 meters lunghezza senza barrieras
- sutpassadi per persunas cun access cuverts, stgalas e rampas
- re/construcziun dal binari da deposit
- nov terminal d'autos da posta senza barrieras, plazza da volver e parcadis per cars
- spustament dal parcadi e nov access sur la Veia Arniev
- aboliziun dal sutpassadi existent inclusiv reorganisaziun dals access per peduns
Ils custs da construcziun muntan a prest 39 milliuns francs, quai senza taglia sin la plivalur. Radund 32 milliuns francs vegnan surprais da la Viafier retica. La vischnanca Albula/Alvra porta 6,9 milliuns francs. Da quels surpiglia il chantun 1,9 milliuns francs.
Il december 2025 ha l'Uffizi federal da traffic concedì la permissiun da construcziun dal project. Ils novs implants da viafier duain vegnir averts il december 2029 (urari 2030), il terminal d'auto da posta l'atun 2030.