Albula/Alvra fusiunada - Il prim d'avust festivescha Albula/Alvra 10 onns fusiun
A chaschun da la festa dal prim d'avust festivescha la vischnanca d'Albula/Alvra er il giubileum da 10 onns. In sguard sin la vischnanca fusiunada faschain nus cun l'anteriur president communal dad Alvagni – ed ussa manader da l'Uffizi chantunal da vischnancas Thomas Kollegger.
El saja fitg losch da sia vischnanca, raquinta Thomas Kollegger e repeta adina puspè quant professiunala che la vischnanca vegnia manada.
La vischnanca Albula/Alvra
Avrir la boxSerrar la box
La vischnanca Albula/Alvra è sa furmada il prim da schaner 2015 sco fusiun da las vischnancas Alvagni, Alvaschein, Brinzauls, Mon, Stierva, Surava e Casti. A la votaziun dals 28 da favrer 2014 ha radund 87% da la populaziun approvà la proposta da fusiunar.
La vischnanca ha ina surfatscha da 93,63 km² e 1'313 abitants ed abitantas (stan 31 da december 2023). L'administraziun communala sa chatta a Casti. President communal è dapi 2015 Daniel Albertin. El è avant stà president communal da Mon.
Kollegger punctuescha era adina puspè ch'el saja losch dad esser in da la vischnanca Albula/Alvra.
Pervia da la situaziun extraordinaria cun la bova da Brinzauls stim jau fitg la lavur professiunala che la suprastanza fa.
En emprima lingia saja el abitant da la vischnanca. Dentant guarda el forsa bain pli exact sin per exempel ils quints annuals u decisiuns. Quai na saja prest betg d'evitar sco manader da l'Uffizi da vischnancas chantunal.
Legenda:
Thomas Kollegger, abitant da la vischnanca Albula/Alvra, e manader da l'Uffizi chantunal da vischnancas.
RTR
Adina puspè constatescha el cun grond plaschair che «sia» vischnanca sa metta en ina fitg buna glisch. Spezialmain era cun tut las sfidas en connex cun la fracziun da Brinzauls.
Grond sustegn per las fracziuns
Natiralmain saja el en emprima lingia dad Alvagni, nua ch'el è stà president communal. La vischnanca Albula/Alvra porschia era in bun sustegn ad Alvagni, sco er las autras fracziuns per las activitads e las uniuns. Tenor Kollegger da moda exemplarica. Ed uschia possia el mo repeter adina puspè, ch'el saja losch da sia vischnanca.
