La mesira das surdar l'Hotel Guidon en novs mauns, pussibilitescha a la BISAG da sa concentrar dal tuttafatg sin ses manaschi principal: la garanzia d'in territori da skis cun naiv segira a Bivio, scriva l’interpresa en ina communicaziun a las medias. Per quest intent vegnan las installaziuns da naiv artifiziala renovadas ed extendidas.
Per finanziar questas investiziuns è en planisaziun ina runda per procurar chapital, inclus in augment dal chapital d'aczias, che vegn suttamess a votaziun l'atun.
Hotel na renda betg
Atgnamain aveva la BISAG cumprà il hotel pir l’onn 2024 d’ina famiglia indigena. Ils retgavs sajan pero stads sut las spetgas ed il manaschi chaschunia memia blera lavur, argumenteschan ils implants da sport da Bivio la midada.
-
Bild 1 von 2. Actualmain vegn il hotel anc renovà. Bildquelle: RTR.
-
Bild 2 von 2. Il hotel Guidon al stradun da Beiva. Bildquelle: RTR.
Nov hotelier nizzegia sinergias
Gregorio Torriani ha ditg sin dumonda ch’el veglia meglierar la rentabilitad da l'Hotel Guidon entras sinergias en il sectur da persunal e da producziun, cunquai ch'el maina gia in hotel bain etablì sco el di. El accentuescha ch'i na dettia naginas desditgas per il persunal da l'hotel Guido e ch'ils contracts che scadan sajan andaments normals. Ina cumpra da l'hotel Guido n'ha per il mument betg prioritad per Torriani, cunquai ch'el sa concentrescha sin investiziuns en ses hotel Solaria.