Mardi saira ha la vischnanca da Surses preschentà ad in’inscunter da l’uniun Pro Bivio il studi da realisabladad per ina nova plazza da campar en il quartier Gravella a Beiva. Radund 60 persunas èn sa participadas a l’occurrenza, tranter quellas indigenas, possessurs da segundas abitaziuns ed auters interessads. Perquai ch’ils votums èn stads uschè critics, ha la vischnanca decidì da betg pli persequitar vinavant il project. Quai ha confermà mesemna Daniel Steiner, il manader dal svilup dal Surses. Sin dumonda ha Steiner ditg che quest lieu fiss stà il sulet lieu adattà per ina plazza da campar en il Surses. Per ils proxims onns na saja in campadi damai nagin tema pli.
Gronds plans fan naufragi
Ils plans prevesevan da construir il campadi sin ina surfatscha dad 1,6 hectaras – circa la grondezza da duas plazzas da ballape. Planisads eran plazs da staziunament per rulottas, tendas e 10 chasinas da lain. Tenor il studi d’in biro da planisaziun da Basilea fissan ils custs da construcziun stads tar radund 6,5 milliuns francs, las entradas fissan stadas calculadas cun circa 750'000 francs ad onn.
