Sco quai che Andreas Lenz, il manader da fatschenta da la Kieswerk Bovas SA da Lai ha ditg, hajan las lavurs da demolir la construcziun da lain funcziunà tenor plan. Sco proxim vegnia ina firma spezialisada lura anc a far lavurs en il plaun sut, per allontanar parts ch'èn vegnidas construidas cun asbest. Suenter vegnia tut il material lura definitiv transportà davent ed il lieu, nua che la stalla era, vegnia renaturada.
Possessur è levgià
Il possessur da la stalla, Daniel Capitani, ha ditg ch’el saja levgìa, che tut saja fin ussa ì senza incaps. Ma i saja schon trist da vesair a svanir sia stalla, ch’el haja ils davos diesch onns pudì nizzegiar per ses hobi, ils oldtimers. Sco pitschna regurdientscha veglia el far ina plazza da grillar dasper l’anteriura stalla, in lieu che duai esser accessibel era a la publicitad.
Donn total pervi dal «rutsch»
La stalla a Brinzauls è ina da trais bajetgs, che vegnan destruids questa stad pervi d’in donn total. Perquai ch'il terren a Brinzauls sa mova per dapli ch'in meter ad onn, datti gronds donns vi da chasas e stallas a Brinzauls. Experts èn il mument vi dad examinar, co ch'ins pudess drenar la muntogna per stabilisar la bova. Ils geologs quintan che aua en la muntogna chaschunia ils gronds moviments dal terren.
