Radund 150 neonazis duain avair sa scuntrà tar in'occurrenza secreta a Tusaun, ha il Sonntagsblick rapportà la fin d’emna. Tenor la gasetta era l’occurrenza vegnida organisada da la rait internaziunala da neonazis «Blood & Honour» ch’è scumandada en la Germania.
La Polizia chantunala conferma sin dumonda da RTR l’occurrenza, discurra dentant da pli paucas persunas e d’ina saira paschaivla.
60 fin 100 persunas hajan fatg part a l’occurrenza. Tgeninas e sche intginas stettian en connex cun «Blood & Honour» n’ha la polizia betg vulì communitgar.
Co è l'occurrenza stada pussaivla?
L'eveniment saja vegnì annunzià sco anniversari, di il possessur da la Karbidhalle, la Bühler Transport SA. Il possessur Marcel Bühler haja gì las infurmaziuns usitadas per talas occurrenzas e n’haja betg fatg ulteriuras dumondas. Era suenter in inscunter cun ils organisaturs n'haja betg dà indicaturs per clientel da la scena dretga. Marcel Bühler saja vegnì infurmà pir la saira da l'eveniment enturn las 22:00 e deplorescha che quel haja gì lieu en sia sala. Era la vischnanca da Tusaun n’haja betg savì da l’occurrenza e saja vegnida rendida attenta via las medias socialas.
Nus n’essan betg loschs da quest'occurrenza e na vulain betg vegnir mess en connex cun quella.
A la Bühler Transport SA na fetschia la vischnanca naginas renfatschas, or da vista da Tusaun saja il lieu da l’occurrenza casualitad. Per analisar la saira ed evitar en futur talas occurrenzas a Tusaun saja la vischnanca en contact cun il possessur da la Karbidhalle e la Polizia chantunala. Quai na saja dentant betg simpel, concluda Remi Crameri, cunzunt or da vista giuridica.
Pertge Tusaun?
Talas sairas da concert sco a Tusaun sajan impurtantas per la scene extrema dretga, declera il perscrutader d'extremissem da la Scola auta turitgaisa per scienzas applitgadas ZHAW invers il journal regiunal dad SRF. Ellas sajan occasiuns per celebrar la medema opiniun e per recrutar nova glieud.
In motiv impurtant per tscherner il lieu d'occurrenza è sch'i dat ina colliaziun cun persunas dretgas che stattan en vischinanza.
I saja in criteri sch'in lieu è accesibel da l'Austria la Germania e la Svizra. Talas occurrenzas sajan era pli simplas d'organisar en regiuns ruralas. La populaziun locala saja main sensibilisada sin il tema ed in pensar conservativ saja tendenzial pli derasà. L'expert n'excluda tar talas occurrenzas era betg in contact cun la politica locala, quel na saja dentant betg decisiv per tscherner il lieu d'occurrenza. Ch'il possessur da la Karbidhalle, Marcel Bühler, n'haja betg savì dal vair motiv per la festa saja plausibel.
D'organisar ina tala festa cun il vair motiv n'è strusch pussaivel.
Il perscrutader d'extremissem di dentant, che cun far intginas dumondas pli concretas possian ins eruir spert tgi che stat davos ina occurrenza. Marcel Bühler veglia en il futur controllar meglier las dumondas per la Karbidhalle – quai era cun agid da la Polizia chantunala, la vischnanca e cussegl giuridic.