Siglir tar il cuntegn

Header

cuntegn

Center da Sanadad Savognin Chattar medis adattads è ina sfida

Adina dapli branschas ed interpresas en il Grischun han fadia da chattar avunda persunas qualifitgadas. Mesemna damaun datti perquai in inscunter suprem organisà dal Parc Ela, nua ch’i va per la mancanza da persunal. RTR ha dumandà il Center da Sanadad Savognin SA, co ch’el vesa la problematica.

Il Center da Sanadad Savognin SA maina in ospital cun servetsch d’urgenza, ina chasa da tgira ed attempads, ed abitaziuns per seniors. 120 persunas partan 83 plazzas cumplainas. Il mument saja la situaziun da persunal buna, ha ditg Christine Demarmels, la directura dal Center da sanadad.

Ma il davos temp hajan ins mintgatant gì fadia da chattar medis ed assistents adattads. Ins haja era gia gì d’emploiar assistents che na discurrivan betg fitg bain tudestg, tge che possia esser in problem per ils pazients. Era da chattar persunal ch’è spezialisà sin radiografias saja grev. Cun quai ch’ins haja betg avunda lavur durant l’entir di, stoppian quels spezialists era far autras lavurs sco en il labor u en il servetsch d’urgenza, e quai saja savens betg quai che persunas spezialisadas giavischian.

RR actualitad 08:00