Siglir tar il cuntegn

Header

Il Center da Sanadad Savognin SA ha in spital ed ina chasa da vegls e da tgira.
Legenda: Il Center da Sanadad Savognin SA ha in spital ed ina chasa da vegls e da tgira. RTR, Federico Belotti
cuntegn

Center da Sanadad Savognin Mo pli dus visitaders per mintga avdant

Per proteger meglier ils avdants da la chasa da tgira e vegls a Savognin, ha il Center da Sanadad decidì, che mintga avdant po mo pli avair visita da maximalmain duas persunas. Quellas duas persunas ston s’annunziar tar il retschaviment, avant ch’els entran en ina chombra d’in avdant.

Sco quai che la co-schefmedia dal Center da Sanadad Savognin, Luwina Johanna Eichweber-Lammers ha ditg envers RTR, saja impurtant da reagir ad uras, e betg cura ch’i saja memia tard. Cun limitar il dumber da visitaders, possian ins sminuir il ristg per ils avdants da la chasa da vegls ed attempads. E cun quai che tut ils visitaders stoppian s’annunziar, pudess ins tar in cas da coronavirus eruir, tgi ch’haja gì contact cun ils avdants.

Chantun recumonda da registrar tgi che vegn e va

Era l'Uffizi chantunal da sanadad ha definì quest'emna novas recumandaziuns per las chasas da tgira ed attempads puncto coronavirus. Sper las reglas d'igiena e las reglas per il persunal (betg lavurar cun sinptoms da grippa e betg vegnir a lavurar, sch'ins ha visità las ultimas duas emnas ina regiun da risico) recumonda il chantun da registrar tut ils visitaders en chasa da vegls.

Uschia possian ins en cas ch'ils virus vegn en chasa, eruir da nua che quel vegnia, declera il manader da l'Uffizi da sanadad Rudolf Leuthold. Per las chasas da tgira saja quai dentant betg ina gronda sfida, cunquai che quellas sajan cunzunt durant il temp d'enviern sensibilisadas per infecziuns, saja quai grippas u er il norovirus.

RR actualitad 17:00

Artitgels legids il pli savens

Ir a sanester Ir a dretg