La fin d'october 2025 ha la butia «Prima» a Salouf stuì serrar las portas. Il motiv eran las finanzas e la mancanza da persunal. Il deficit annual da 55'000 francs n'è betg pli stà supportabel. Las abitantas ed ils abitants da Salouf n'èn betg stads d'accord cun questa decisiun ed han perquai fundà la societad cooperativa «Pro Salouf».
Na be ina butia per cumprar en
La societad «Pro Salouf» ha fatg in nov concept per la nova butia. Quest concept ha ella preschentà a la suprastanza communala da Surses e l'istorgia ha piglià ina buna fin. Dus mais pli tard èn las portas da la nova butia cun il num «la buteia» finalmain avertas.
-
Bild 1 von 5. Entrar pon'ins cun la carta da banca, la butia è averta 24 uras durant 7 dis l'emna. Bildquelle: RTR.
-
Bild 2 von 5. Per bavrondas alcoholicas èsi era da «mussar» la carta d'identitad. Bildquelle: RTR.
-
Bild 3 von 5. Bildquelle: RTR.
-
Bild 4 von 5. En la stizun vegnan er vendids products regiunals. Bildquelle: RTR.
-
Bild 5 von 5. La butia ha in nov vestgì cun paraids coluradas, nova decoraziun, auters products ed in nov sistem da cassa. Bildquelle: RTR.
Abitantas ed abitants da Salouf èn fitg cuntentas che lur butia è puspè «turnada». Per intginas ed intgins dad els è la stizun numnadamain dapli che ir confortablamain a far las cumissiuns, igl è er in lieu d'inscunter nua ch'ins po dar ina paterlada.
Jau sun fitg commuventada cha quai è propi gartegià. Cun l'agid da giuven e vegl e cun la solidaritad da la vischnanca, èsi stà pussaivel da purtar enavos quella butia en il vitg.
Il concept prevesa che la butia è averta 24 uras durant 7 dis l’emna cun in sistem da «self checkout». Entrar pon ins cun la carta da banca. Durant uras definidas vegn la stizun era tgirada. In tal concept datti er gia a Vignon en Val Lumnezia cun «la stizun». La butia porscha tut quai ch'i dovra per il mintgadi sco er inqual product indigen.