La forza idraulica en il chantun Grischun è confruntada cun grondas midadas. Ils proxims dus decennis scadan pliras concessiuns – fin il 2042 èn quai sis. Uschia pudessan numerusas ovras vegnir transferidas en il possess dal chantun e da las vischnancas. Per la regenza grischuna èsi cler: La forza idraulica duai en l'avegnir contribuir pli fitg a la creaziun da valur en il chantun. «Oz avain nus ina buna survista da las structuras da las ovras idraulicas en il chantun», ha ditg cussegliera guvernativa Carmelia Maissen a la dieta da vischnancas a Cazas. Dapi l'onn 2022 lavura ses departament vi d'ina strategia cumplessiva da forza idraulica che duai vegnir realisada cuntinuadamain fin l'onn 2050.
Diversas sfidas en il Surses
In exempel concret è la vischnanca da Surses. Là scada il 2035 la concessiun per l'ovra electrica a Tinizong, che vegn gestiunada da l'Ovra electrica da la citad da Turitg (EWZ). Gia l'onn passà ha la radunanza communala refusà ina prolungaziun.
Sche e co che l'EWZ po anc sa participar en il futur, è anc avert. Spezialmain dispitaivel è il project d'auzar il rempar da Marmorera per 14 meters. Uschia pudess ins producir bler dapli electricitad durant l'enviern. Punct da custs: var 100 fin 150 milliuns francs. Ma la gestiunaria EWZ è sceptica. «Per investiziuns uschè grondas duvrain nus garanzias. Uschè ditg ch'i n'è betg cler, sche nus dastgain manar l'ovra er en l'avegnir, n'è quai strusch pussaivel», ha ditg Philippe Heinzer da la direcziun da la EWZ envers SRF.
Regenza grischuna vul profitar dapli da l'aua
«Er ils chantuns da muntogna han in interess da contribuir lur part a la segirezza da provediment da la Svizra», punctuescha cussegliera guvernativa Carmelia Maissen. Il medem mument vul il chantun dentant avair dapli vusch en chapitel ed ina part pli gronda da las entradas. En il cas da l'ovra electrica Tinizong vul il chantun – ensemen cun la vischnanca – prender ils proxims sis mais emprimas decisiuns e sclerir tge rolla che l'EWZ duai avair en il futur, ha Maissen declerà.
