Astrid Thurner è savens da viadi en la natira. Durant las spassegiadas cun ses chaun ha ella survegnì pli e pli marveglias, tge utschels ch'ella auda en il guaud. L'emprim è ella s'infurmada cun cudeschs davart ils utschels indigens. Il 2018 – sin sia pensiun – ha ella fatg il curs d'ornitologa champestra a Cuira per engrondir ed approfundar sia savida.
Per differenziar il chant da varsaquants utschels fa ella diever d'applicaziuns sin il telefonin. Ina, cun la quala ins po tschertgar ils differents utschels e tadlar, co che quels tunan - ed in'autra che registrescha il chant dals utschels ed inditgescha tgenin ch'igl è.
-
Bild 1 von 3. En ils mirs dal chastè da Riom cua la populaziun da curnagls da l'entira Europa. Bildquelle: RTR.
-
Bild 2 von 3. Astrid Thurner da Savognin. Sia passiun è la natira. Surtut fluras ed ervas selvadias interesseschan Astrid Thurner, ma er ils utschels. Bildquelle: RTR.
-
Bild 3 von 3. En la tur dal chastè da Riom cua in crivel. Bildquelle: RTR.
Durant la spassegiada ed il raschieni cun Astrid Thurner sent'ins sia passiun per la natira e per ils utschels. Il fieu tschiffa immediatamain er il visavi.
Sin in'insla solitaria prendess jau cun mai il cudesch 'La flora helvetica' ed in cudesch d’utschels.
Apaina ch'ins taidla cun in zic dapli attenziun il chant dals utschels ed eruescha cun agid da l'applicaziun sin il telefonin las differentas spezias, percepeschan ins cun ina giada tut auter il chant dals utschels.