Musica collia – quai è il motto da l’Associaziun da las scolas da chant e musica dal Grischun ACMG. Sco ch’ella scriva en ina communicaziun, duai l’inscunter esser ina nova plattafurma che promova il barat, la rait e la percepziun publica da las scolas da musica da l'entir chantun.
Spetgads vegnan var 220 persunas d'instrucziun sco er mainascolas, delegads e giasts da la politica, da l'economia e da la societad. «Nossa finamira è da rinforzar la conscienza per l'impurtanza da la furmaziun musicala – en il mund professiunal tant sco en la vasta publicitad», declera Patric Vincenz, president da l'ACMG. L'associaziun cumpiglia actualmain 17 scolas da chant e da musica en il chantun.
Vast program
Il program dal di cumenza a las 10:00 cun in'avertura musicala e cun salids dal minister da cultura ed educaziun Jon Domenic Parolini e da Philippe Krüttli, president da l'Associaziun da las scolas da musica svizras. In punct culminant saja il referat da la pedagoga da musica enconuschenta Kristin Thielemann davart il tema «Motivaziun pedagogia da musica – Co che scolas da musica promovan cumpetenzas centralas da damaun». Il suentermezdi suondan forums professiunals e lavuratoris.
Inscunter annual
Il di chantunal da scola da musica duai vegnir realisà en l'avegnir mintg'onn la segunda sonda suenter il cumenzament da l'onn da scola. Cun il lieu d'occurrenza a Landquart ch'è situà en il center e cun l'infrastructura professiunala stgaffescha la ACMG in format persistent per rinforzar ils fatgs da la scola da musica en il chantun.
La participaziun è gratuita per tut las persunas envidadas. Ils custs da var 39'000 francs vegnan surpigliads da l'uniun ensemen cun las scolas da musica associadas.