Sco quai che la pledadra da la Polizia chantunala ha ditg envers RTR, sajan els vegnids fatgs attents d’ina vischina ch’i vegnia fatga ina messa ad Alvaschagn. Al lieu haja la polizia suenter la messa constatà che set persunas sajan stadas preschentas cun il plevon.
Uvestgieu da Cuira na va betg d'accord
Attent sin la messa senza lubientscha è era l’uvestgieu da Cuira vegnì. Quel haja pliras giadas fatg attent publicamain, ch’ins stoppia suandar strictamain las reglas da la Confederaziun e dals chantuns. Cun il plevon hajan ins tschertgà il discurs, conferma l’uvestgieu da Cuira sin dumonda da RTR.
Plevon deplorescha
Igl plevon Paul Schlienger ch’ha fatg la messa ha ditg, ch’el haja pensà ch'i saja pussaivel da far ina messa en il rom privat. Da l’uvestg saja el vegnì infurmà ch’ins possia far messas en il rom privat cun enfin tschintg persunas. Cun serrar la baselgia haja el mantegnì il rom privat, ed er la distanza sociala saja adina stada garantida. El deploreschia però il sbagl che saja capità entras ina malprecauziun da sia vart cun laschar memia bleras persunas en la baselgia d’Alvaschagn.
