La Regenza dal chantun Grischun ha approvà la revisiun parziala da la planisaziun locala da la vischnanca da Surses. Cun l’adattaziun dal plan da zonas en il center dal vitg da la fracziun da Mulegns èn las premissas per la «Tur dals pastiziers» stgaffidas.
La tur da 30 meters vul la Nova Fundaziun Origen installar sco part dad in project cultural. Il sectur d’utilisaziun per edifizis temporars culturals è limità a tschintg onns. Suenter quest temp vegn la tur puspè demontada. Uschia vegn era il maletg dal vitg be midà temporarmain. En il plan general da furmaziun èn plinavant definids il sectur da parcadi ed ina lingia da construcziun da la tur.
