En il cumbat da votaziun è sa mussà che la collavuraziun tranter l’organisaziun turistica ed il Parc Ela n’è betg buna. Ina collavuraziun constructiva sut las circumstanzas actualas na saja betg pli pussaivla. Perquai pretenda Carmen Dedual, suprastanta dal Parc ela e co-inizianta dal comité «Gea al Parc Ela» che Luzi Thomann ed Eveline Saupper sa retirian da lur uffizis en la Turissem Savognin Beiva Alvra (TSBA) SA.
Sco quai ch’els han ditg envers RTR na saja ina demissiun però nagin tema. Els hajan simplamain adina s’engaschà encunter l’idea d’integrar il territori da skis da Savognin en il Parc Ela. E quai saja gea pussaivel cun la democrazia en Svizra, han omadus ditg.
Collavuraziun tranter turissem e parc è manglusa
Luzi Thomann, il president da la TSBA SA, ha ditg ch’i saja era da far la proposta da midar ora Dieter Müller il directur dal Parc Ela. Tenor Thomann na saja la collavuraziun cun il directur betg buna. RTR n’ha betg cuntanschì Dieter Müller per laschar prender posiziun.
Il president dal Parc Ela, Paolo Giacometti, ha però ditg, che tgi che lavuria en il Parc Ela saja ina decisiun da la suprastanza dal Parc Ela. Quai valia da respectar. Sch’insatgi haja problems u differenzas, dettia adina la pussaivladad da discutar surlonder. La fin finala giaja quai per chaussas e fatgs e betg per persunas.
