L‘arena da sport La Nars a Savognin duess vegnir construida sco planisà. Perquai ha la radunanza communala da Surses deliberà cun 88 cunter 26 vuschs in credit supplementar da 1,1 milliuns francs per mauns da l’urna dals 25 da settember. Il credit supplementar è daventà necessari, perquai che diversas lavurs daventan pli charas che budgetà. Uschia custa per exempel l‘ustaria nova dapli che previs, perquai che quella vegn ad avair avert l‘entir onn. En tut duessan vegnir investids 5,6 milliuns francs en la plazza da sport che cumpiglia in glatsch artifizial, plazzas da tennis e la nov'ustaria.
La proposta da refusar la tractanda e da dar enavos la fatschenta a la suprastanza communala, ha la glieud preschenta refusà cun 74 cunter 27 vuschs.
Betg cler nua ch'il lavuratori nov duess esser
Betg votà è vegni davart il credit da passa 3,2 milliuns francs per construir in nov lavuratori communal a Cunter. La proposta da Guido Luzio è vegnida approvada cun 89 cunter 34 vuschs. El ha pretendì che la fatschenta vegnia surlavurada da la suprastanza. Surtut il lieu e las localitads da la firma «Vonbüren restaurieren» a Cunter na sajan betg adattadas. Plinavant sajan ils custs budgetads bler memia auts – a Savognin giaja quai franc pli bunmartgà ha el fatg valair.
Atgnamain aveva il suveran da Surses votà il favrer passà da cumprar las localitads da la firma Vonbüren. Surses dovria in nov lavuratori communal, perquai che las localitads actualas en il bajetg da la scola primara vegnan duvradas per in auter project.
Ulteriuras decisiuns
Plinavant ha la radunanza communala da glindesdi saira decidì:
- in credit d‘object brut da 700‘000 francs per ina nova staziun da trafo a Tinizong. Quella daventa necessaria pervi da la nova resgia che vegn il mument construida.
- da vender l‘anteriura chasa communala da Marmorera per 220‘000 francs ad in burgais da Puntraschigna.
- da cumprar per 250’000 francs la chamona Tgesa da Sett a Beiva da las Ovras electricas da Turitg EWZ. Quella vegn duvrada en connex cun il Parc Ela Trek. En la Tgesa da Sett pudessan per exempel abitar ils gestiunaris da la chamona per viandantas e viandants che sa chatta gist dasper la Tgesa da Sett.
