Sco che l’Auto da Posta Svizzer scriva sin dumonda dad RTR funcziuna il nov urari en la regiun Alvra bain. Las colliaziuns tar il nov punct central da traffic Alvra a Casti sajan sa stabilisadas suenter ch’igl haja l’entschatta dà tscherts retards. Quants passagiers che fan diever dal nov bus che cursescha sin la nova lingia Tusaun – Casti – Savognin na pon ins betg anc dir, perquai ch’i sa tracta anc d’in servetsch nov.
Buna purschida cun potenzial
Luzi Schutz, il parsura da la conferenza da presidents da la Regiun Alvra è cuntent cun la nova purschida: «Il nov concept dal traffic public è in grond pass, nus avain bler dapli colliaziuns ed ellas èn coordinadas meglier che pli baud.» Potenzial per meglieraments vesa Schutz dentant anc la damaun e la saira: «Tut n'è betg anc perfect, nus guardain tge che va bain e nua ch’i dovra anc adattaziuns.»
Midadas tar il bus da sport a Savognin e Cunter
A Savognin hai dà midadas vi dal bus da sport che vegn finanzià dal turissem, da la vischnanca Surses e da las Pendicularas. Uschia èn las staziuns Sot Spondas e Soras mo pli cuntanschiblas mintg’ura e betg pli sco fin qua mintga mes’ura. Sco che Leo Thomann, il president communal da Surses, ha ditg, saja la raschun in nov bus pli bas che saja adattà a persunas cun in impediment. Quel na vegnia betg pli da charrar sin la via stretga e taissa. Cun quai ch’in dals dus bus da sport saja anc in vegl, possia quel dentant passar ina giada a l’ura era tar las duas staziuns menziunadas.
Per l’avegnir pondereschan ins dentant sche la via pudess vegnir adattada uschia ch’era in bus pli modern possia passar la runda da Soras e Sot Spondas. Perquai ch’in bus a l’ura na fa betg pli l’entira runda usitada a Savognin, dettia da nov però la pussaivladad da porscher dapli curs dal bus da sport fin a Cunter, cun quai ch’il bus spargnia temp a Savogni, ha ditg Thomann.
