Per il project dal resort da vacanzas Viols èn ussa era l’investider ed il manader enconuschents. Il Mountain Resort Fund SICAV da Sion investescha en il project, il manaschi surpiglia Swisspeak Resorts. Ultra da quai vegn il resort existent Surses Alpin vendì al fond ed integrà en la medema structura, ed en l’avegnir era manà da Swisspeak.
Glisch verda suenter onns da cumbat
Il zercladur 2025 aveva la Resalpina GmbH infurmà, ch'els veglian cumenzar las lavurs la primavaira dal 2026. La lubientscha da construcziun saja gia valida e na stoppia betg vegnir renovada. Suenter ina lunga perioda da cas da dretgira aveva il Tribunal federal refusà tuts recurs l’onn 2024, ed uschia dà glisch verda per la realisaziun dal resort da vacanzas Viols.
Marcel Friberg, manader da Resalpina GmbH, aveva declerà: «Nus essan uss en las ultimas fasas da planisaziun detagliada e preparain la submissiun per las lavurs. La lubientscha da construcziun è en vigur, uschia ch’ins po cumenzar suenter l’atun. Las investiziuns èn s’augmentadas pervi dals cas giudizials da 30 a circa 40 milliuns francs.»
Surses dat glisch verda per via e parcadis
La vischnanca Surses ha deliberà l’avrigl 2025 in credit d’investiziun da 948’000 francs per la construcziun da la via d’access privata e da las plazzas da parcar. Ils custs vegnan repartids tranter la vischnanca ed il proprietari dal resort.
L'istorgia davart ils recurs
Il project turistic Viols è vegnì tractà duas giadas dal Tribunal federal. Encunter il project inoltrà il 2019 aveva la Helvetia Nostra fatg recurs cun l'argumentaziun ch'igl haja dà sbagls formals e che la lubientscha che la vischnanca da Surses ha dà al project saja d’annullar.
Suenter ch'il cas è ids duas giadas tranter la Dretgira administrativa dal chantun Grischun ed al Tribunal federal vi e nà vegn lezza en sia segunda decisiun a la conclusiun che las proceduras sajan vegnidas tegnidas en. En sia argumentaziun scriva il Tribunal federal che damai ch'ils investurs desistian ussa da bajegiar la tur cun ascensur, e cun quai crodia il sulet punct dispitaivel dal project davent, uschia ch'il recurs vegnia renvià.