Curling ha ina tradiziun da 60 onns a Savognin. Gia l’onn 1964, cun l’emprima plazza da glatsch natirala a Tigignas, han ins mess il crap da fundament. L’emprim turnier ha gì lieu il schaner 1965 tar fier -27 grads. Ils 13 da favrer 1965 han nov commembers fundà il Club da curling Savognin en l’hotel Pianta.
Il record da commembers ha il club nudà l’onn 1975 cun passa 60 activas e passivas. Oz quintan 35 commembers activs ed 8 commembers passivs. Sportivamain ha Savognin procurà l’onn 1983 per furori, cura ch’in team ha cuntanschì l'otgavel plaz al turnier svizzer en il liber a Kandersteg.
Per il giubileum da 60 onns ha lieu la fin d’emna in turnier cun 16 squadras. L’enviern 2025/26 stattan plinavant sin il program 12 concurrenzas internas, avertas era per betg commembras e per betg commembers.