L’hotel Danilo a Savognin è istorgia. Durant decennis era el er in punct d’inscunter cun sia discoteca legendara. Uss è cler: Il bajetg resta serrà e duess vegnir demolì. Sin il medem plaz è previs in nov project da construcziun. Fin a mesemna passada eran ils plans publitgads. La vischnanca Surses spetga anc oz eventualas recurs. Suenter duessan la cumissiun da construcziun ed il manader dal project vegnir infurmads, ha oz confermà la vischnanca da Surses. La Salve SA è responsabla per il project.
Emprima butia dal Coop en il Surses
Da quels plans da construcziun exponids publicamain resulta ch’almain dus bajetgs moderns èn previs. Sin il plaun terren è prevedi spazi da fatschenta cun grondas fanestras. Plinavant prevesa il project ina garascha sutterrana, abitaziuns, spazi per diversas fatschentas cun banca ed in café. Diversas interpresas indigenas han gia mussà interess. Nov è era: Coop fa part dals interessents. Per il grossist da Basilea è previs ina zona da vendita da passa 600 meters quadrat.
Ils plans dal Coop
Fin uss aveva Coop planisà in project separà en in auter lieu a Savognin, numnadamain sin ses agen terren a l’entrada dal vitg, dasper il tancadi. Anc il schaner confermava in pledader da Coop ch’il project vegnia anc persequità vinavant. Coop saja er en contact cun l’Uffizi federal da vias ASTRA per dumondas da l’access, ha il Coop communitgà sin dumonda. Tuttina existan actualmain infurmaziuns inuffizialas che Coop sa concentreschia ussa sin il plaz da l’anteriur hotel Danilo e renunzia al project sin l’agen terren. Coop n’ha betg confermà ni dementì questas infurmaziuns envers RTR.
Spetgar sin lubientscha da bajegiar
Ils plans da construcziun sin l’areal da l’anteriour hotel Danilo èn vegnids inoltrads da la Salve SA. Part da l’interpresa fan Beat Hug, ch’ha gia realisà il resort Surses Alpin, sco era Luzi Thomann, il president dal cussegl d’administraziun da la Salve SA ed anteriur president da la societad anonima da turissem da Surses. Sin dumonda ha Thomann ditg ch’el spetgia ussa sin la lubientscha da bajegiar, suenter vegnia il project preschentà en detagl a la publicitad.