Padel, ina cumbinaziun dinamica tranter tennis e squash, fa ussa part da l'offerta da l'implant da sport La Nars. «Igl è in grond boom ed ina excellenta purschida supplementara per indigens e per giasts», di Peter Baggenstos, responsabel da l'implant.
Il grond avantatg: Cuntrari al tennis classic èsi fitg simpel d'emprender il gieu. Er persunas senza experientscha pon spert festivar ils emprims success e giudair il plaschair dal gieu, che vegn per il solit giugà en quatter persunas.
Ina premiera svizra cunter la canera
Che quest project ha pudì vegnir realisà è er d'engraziar ad ina innovaziun tecnica. Pervia da quitads da vischins concernent la canera hai dà recurs ch'han retardà la construcziun.
-
Bild 1 von 5. La nova plazza da padel a La Nars. Bildquelle: RTR.
-
Bild 2 von 5. Peter Baggenstos, scolast da tennis è responsabel per la nova plazza da padel. Bildquelle: RTR.
-
Bild 3 von 5. Era questas pitgas e stangas da fitness èn novas. Bildquelle: RTR.
-
Bild 4 von 5. La palutta da padel è leva, era la balla è pli leva che quella da tennis. Bildquelle: RTR.
-
Bild 5 von 5. La famiglia De Leur dad Einsiedeln fa vacanzas a Savognin, els han gia giugà sin la nova plazza. Jeroen De Leur di ch'ella saja fitg buna e quieta. Bildquelle: RTR.
Ils responsabels han reagì e fatg construir il plaz cun ina construcziun speziala da vaider dubel. Tenor Peter Baggenstoss sa tracti da l'emprim plaz da padel cun vaider dubel en Svizra. Emprims giugaders che han testà l'implant èn entusiasmads e conferman che la differenza da canera è cleramain perceptibla.
In enritgiment per il turissem en il Surses
Il project è naschì sin iniziativa dal club da tennis cun il sustegn da la vischnanca da Surses. Er sche padel fa il pli grond plaschair da giugar cun quatter persunas, po il plaz vegnir duvrà era da dus persunas per trenar la tecnica ed il sentiment per la balla. Il nov plaz a La Nars è pront per vegnir duvrà immediatamain e duai daventar in nov punct culminant da la stad en il Surses. L’inauguraziun uffiziala è venderdi, ils 17 da fanadur.