Il terren sut Brinzauls è gia daditg en moviment, uschia hai per exempel er gia dà il 1877 ina gronda bova. E sco quai che la vischnanca scriva sin sia pagina d'infurmaziun davart la bova, sa mova l'entira terrrassa da la bova probablamain gia dapi l'ultim temp da glatsch (avant ca. 10'000 fin 15'000 onns) . Ils ultims 100 onns è il vitg sa ruschnà mintgamain intgins centimenters ad onn. Il grond midament hai però dà ils ultims 20 onns. Il terren sa mova massivmain pli spert, sco che las graficas sut mussan.
Impurtants eveniments dals ultims onns
- Matg 2017: Cun quai ch'il vitg sa mova per var 50 centimeters vegn ordinà in scumond da bajegiar. Brinzauls è uschia en ina uschenumnada zona cotschna.
- Zercladur 2019: la populaziun vegn infurmada davart in plan d'evacuaziun en cas che la bova da 22 meters cubics avess da vegnir giu. Er Vazarouls, Surava e Casti fissan pertutgads.
- November 2019: La regenza grischuna declera la bova da Brinzauls sco «situaziun extraordinaria» ed empermetta agid finanzial sco er persunal.
- December 2019: Il program da perfuraziun cun otg furadas è vegnì terminà. Ils geologs han constatà ch’il grip stabil da Brinzauls sa chatta sin ina profunditad da radund 150 meters sut terra.
- Fanadur 2020: Ina chasa ed ina stalla duain vegnir sbuvadas. Ellas èn donnegiadas fermamain pervi dal moviment dal terren.
- Settember 2021: cumenzan las lavurs da perforaziun per in tunnel da sondagi, el duess drenar il terren ed uschia stabilisar il terren che glischna.
- Matg 2022: La via a Lantsch vegn serrada automaticamain tras il sistem da surveglianza suenter ina crudada da crappa.
- Settember 2022: Il tunnel da sondagi para da mussar in effect. Dentant vegn gia lura l'«insla» identifitgada sco zona problematica.
- Mars 2023: Il president communal Daniel Albertin infurmescha a la radunanza generala sur dal moviment da l'«Insla» adina pli svelt.
Or da l'archiv
