La corporaziun d'alp da la Muntogna da Schons administrescha en tut set alps. 40 purs da la regiun alpegian da quai da 840 tocs muvel.
Persunal hajan ins avunda, di il president da la corporaziun, Beni Michael. Quitads fetschia la preschientscha dal luf. Er sch'il triep dals lufs dal Beverin na saja betg pli, observeschian ins adina puspè il luf.
Quitads fa la preschientscha dal luf
La preschientscha dal luf portia gronda malquietezza en la muaglia, uschia che la lavur cun la biestga daventia privlusa, declera Michael vinavant. E la fin finala saja quella malquietezza da la biestga er fitg privlusa per viandantas e bikers.
Il mument pauc'aua
Sper la preschientscha dal luf è er la situaziun d'aua ina sfida. Cun pauca naiv ed ina primavaira sitga è la situaziun d'aua sin las alps betg optimala. La speranza saja ch'i vegnia anc a plover il proxim temp per betg vegnir en ina situaziun da mancanza.
Impurtant per mintga alp saja che la muaglia ed il persunal turnian il settember saun e cuntent e ch'ins n'haja betg da registrar accidents.
Perquai fa Beni Michael er in appel a viandantas e bikers: «Tavlas da scumond ed avis èn in agid per la segirtad da tuts». I haja numnadamain adina in motiv sch'ina senda vegnia serrada u sch'igl è signalisà in detur.