Siglir tar il cuntegn

Header

Chasa communala da Surses.
Legenda: RTR, Federico Belotti
cuntegn

Surses Duas radunanzas communalas enstagl dad ina

Schebain la vischnanca po prolungar il contract cun il Parc Ela u betg, vegn uschia decis pir la fin da schaner. Davart il preventiv 2021 vegn decidì mez december.

Passa 180 persunas dal Surses han suttascrit ina petiziun. Els fan quitads pervia dal coronavirus e che bleras persunas na pudessan betg vegnir a la radunanza communala. Uschia na fiss ina decisiun cun pitschna participaziun betg represchentativa. La tractanda impurtanta fiss stada, sche la vischnanca da Surses duai prolungar il contract cun il Parc Ela per ulteriurs 10 onns.

Duas radunanzas communalas enstagl dad ina

La suprastanza da la vischnanca da Surses accepta la resalva che la glista da tractandas per la radunanza communala dals 30 da november fiss stada memia lunga. Quai surtut era perquai ch’il tema dal Parc Ela sveglia emoziuns e discussiuns pli lungas.

Perquai communitgescha la suprastanza, che la radunanza da glindesdi proxim vegn annullada respectivamain partida en duas parts: ina radunanza cun il preventiv e credits ils 14 da december, in’autra cun la decisiun pervia dal Parc Ela ils 25 da schaner 2021.

Martina Lanz da l'hotel Post a Bivio ed ina da las iniziantas da la petiziun èn trumpads ch'i na dettia betg ina votaziun a l'urna. Per il president da la vischnanca da Surses Leo Thomann èsi dentant cler, ch'els organiseschan ina radunanza communala ils 25 da schaner. Quai almain sch'il virus na impedeschia quai betg ed els possian resguardar las mesiras ch'il chantun e la confederaziun prescrivan. La suprastanza saja vegnida encunter als iniziants da la petiziun cun desister d'ina radunanza communala cun 13 tractandas (ils 30 da november). Ma tenor la constituziun communala saja tuttina pussibel d'organisar ina radunanza communala.

RTR novitads 12:00

Artitgels legids il pli savens

Scrollar a sanestra Scrollar a dretga