La fin da l'onn ha ina communicaziun da l'Uffizi federal per statistica procurà per grittas tar las vischnancas da Surses e Muntogna da Schons. L'Uffizi quinta las duas vischnancas rumantschas sco vischnancas tudestgas cun quai che la maioritad da la populaziun haja inditgà pli savens tudestg enstagl da rumantsch sco lingua che vegn discurrida. L'Uniun Rumantscha Grischun Central e la Lia Rumantscha han intervegnì tar l'Uffizi senza success. Er la regenza Grischuna ha scrit a l'Uffizi – er senza success. Ussa pretenda ina interpellaziun dal cusseglier dals chantuns Stefan Engler dal Cussegl federal da prender posiziun. Tranter auter vegn fatg la dumonda sch'il Cussegl federal è pront da coordinar il territori da lingua cun il territori ch'il chantun definescha sco rumantsch e betg la statistica menziunada.
Per Simona Demarmels, la copresidenta da l'Uniun Rumantscha Grischun Central, mussan las cifras da l'Uffizi da statistica betg la realitad da la regiun. La vita da mintga di sin via, en scola ed en general saja rumantscha. Uschia spetga ella che la carta da lingua mussa la fin finala er quai.
Per Andreas Gabriel da la Lia Rumantscha fa l'uffizi da statistica politica cun publitgar ina carta correspundenta. La lingua saja e resta la cumpetenza dal Chantun e cun far ina tala publicaziun saja l'uffizi sa maschadà en la politica. Quai saja inacceptabel.
