En la chavorgia da Solas duai dar duas punts pendentas da 120 e 240 meters lunghezza. Il 2020 ha quest project turistic da la Regiun Alvra survegnì glisch verda dal chantun. La primavaira 2022 ha la dretgira administrativa dentant dà suatientscha al recurs da la Fundaziun svizra per la protecziun da la cuntrada e da l’uniun Mountain Wilderness.
Sinaquai è la vischnanca Albura/Alvra sa decidida d’ir avant il Tribunal federal. Era perquai che blers daners e blera lavur sajan gia vegnids investids en il project «Aventura Alvra», ha la vischnanca argumentà.
Uss è la sentenzia qua
En sia sentenzia publitgada la mesemna dat il Tribunal federal raschun a la vischnanca tar la dumonda, sche las punts pendentas hajan consequenzas negativas sin il spazi d’aua. Quai na saja betg da spetgar pervi dal diever planisà, da l’autezza da las punts pendentas lunsch sur il flum Alvra, la ladezza modesta e la construcziun che lascha tras glisch, aria e plievgia.
I dovra ina expertisa
La vischnanca Albula/Alvra era da l’avis, ch’i saja anc memia baud per laschar prender posiziun las cumissiuns federalas responsablas. Quai per sclerir quant fitg ch’il maletg da la punt Solas vegni disturbà dal project.
Il Tribunal federal di uss cler, che la regenza grischuna avess stuì laschar far in’expertisa – sin basa da la lescha federala davart la protecziun da la natira e da la patria. La Tgira da monuments dal Grischun aveva ditg che quai saja necessari.
En l’expertisa ch’i dovra uss vai per examinar – quant ferm che las finamiras per proteger la punt da Solas vegnan influenzadas tras las lavurs planisadas. E l’expertisa duai sclerir co questas influenzas pon vegnir reducidas cun midar il project, u cun fixar cundiziuns.
La finala constatescha il Tribunal federal, che la regenza grischuna avess stuì ir per l’expertisa gia cun tractar la revisiun parziala dal territori e la runcada da guaud.
La reacziun da la vischnanca
La vischnanca d'Alvra fissi naturalmain gugent gia in pass pli lunsch cun la construcziun da las punts pendentas, i saja dentant d'acceptar la decisiun dal Tribunal federal, di Reto Crameri, suprastant da la vischnanca. La decisiun mussia dentant era ch'igl saja en urden da construir las punts sur la chavorgia vi. A la vischnanca saja impurtant da pussibilitar novas chaussas, e betg d'evitar quellas. Ins veglia dentant era evitar donns vi da la cuntrada u la punt crap da Solas, che saja gia là dapi 150 onns. Uschia pondereschian ins da tegnair in zic dapli distanza cun la punt pendenta da la punt existenta.
La vischnanca spera che l'expertisa è pronta l'onn che vegn, per che la regenza grischuna possia alura decider da novamain davart la planisaziun da zona, e la lubientscha da runcar il guaud.
