Cun ils daners dal credit supplementar duain vegnir finanziads ils ultims pass da planisaziun – tranter auter ina terza exposiziun da cooperaziun publica, l’evaluaziun da quella sco er la preparaziun da la radunanza communala che decida. A quai ha la radunanza communala ditg gea cun 132 vuschs cunter 4 na.
La revisiun da la planisaziun locala dura gia dapi l’onn 2018 en Tumleastga. La finamira è d’adattar la planisaziun al dretg da la planisaziun dal territori surordinà da la confederaziun e dal chantun, e da segirar a lunga vista il svilup da la vischnanca. En tut èn resultads fin ussa custs da radund 481'000 francs. Approvads eran vegnids oriundamain credits d’impegn da totalmain 315'000 francs.
Ils ultims onns ha la radunanza communala gì da decider pliras giadas davart credits supplementars. In ulteriur credit supplementar da 150'000 francs è vegnì refusà per pauc il november 2024. Er in credit pli bass ha fatg naufragi tar in’ulteriura radunanza communala.
In motiv per ils gronds custs è stada tranter auter la ferma participaziun da la populaziun, scriva la vischnanca en ses messadi per la radunanza communala. Gia a l’emprima ediziun da participaziun hai dà var 1100 inoltraziuns – diesch giadas dapli che spetgà oriundamain.
Adattà il process
La suprastanza communala ha en il fratemp adattà organisatoricamain il process. Ussa na duai dar nagina cumissiun pli per la planisaziun locala. Empè da quai cuntinuescha la suprastanza la revisiun ensemen cun in biro da planisaziun dal territori.
L’uffizi chantunal per il svilup dal territori giuditgescha en general positiv la planisaziun locala ch’è vegnida elavurada fin ussa. Tenor l’uffizi correspunda ella en puncts centrals a las pretensiuns da la lescha, ma en singuls secturs dovria quai anc adattaziuns.