Turas da skis - Sustegn tecnic per far turas da skis

Valentin Luzi è in cun bleras ideas – ed in che fa. Uschia ha el gì suenter ina tura l'idea d'in agid tecnic. El ha notà quella sin ina servietta e cumenzà cun la realisaziun. Cun agid d'in constructur mecanic spezialisà ha el ils davos quatter onns sviluppà trais prototips.

Impressiuns dal sistem electric

L'actual saja uschenavant pront per ir en producziun. «Ussa stuain nus mo pli metter la battaria directamain en la platta e vegnir davent dals cabels.» Quai saja tecnicamain pussaivel senza problems, raquinta l'um pensiunà. Ma quel pass saja da far per vegnir sin il martgà.

Ir en producziun

Ir en producziun saja il proxim pass. Quel saja però collià e dependent da dus facturs decisivs: Per l'ina da chattar ina firma che ha interess, e per la segunda dovra quel pass puspè investiziuns da circa 80'000 francs. Tant ha Valentin Luzi gia investì fin ussa.

Ina pussaivladad fiss er da producir ina pitschna seria ed ir cun quella sin il martgà e tar affars da sport, per uschia survegnir novs feedbacks ed in effect da reclama. Cun ses e-swiss-ski è Luzi en mintga cas persvadì d'esser sin la dretga via e dad esser curt avant cuntanscher la finamira.