Tusaun
-
La extrema dretga è s'incuntrada en il Grischun
A Tusaun duain persunas da la scena extrem dretga avair organisà in inscunter. Ni il possessur dal local ni la vischnanca paran d'avair savì da l'inscunter. La Polizia chantunala relativescha entant.
Autor:
Elias Tsoutsaios
04.05.2026, 17:35
Radund 150 neonazis duain avair sa scuntrà tar in'occurrenza secreta a Tusaun, ha il Sonntagsblick rapportà la fin d’emna. Tenor la gasetta era l’occurrenza vegnida organisada da la rait internaziunala da neonazis «Blood & Honour» ch’è scumandada en la Germania.
La Polizia chantunala conferma sin dumonda da RTR l’occurrenza, discurra dentant da pli paucas persunas e d’ina saira paschaivla.
La resposta da la Polizia chantunala:
Avrir la box
Serrar la box
«La sonda, ils 18 d'avrigl 2026, ha gì lieu in concert da musica a Tusaun en l'uschenumnada Karbidhalle. La halla è vegnida affittada tar il proprietari, quel aveva las indicaziuns usitadas davart la fittanza e n'ha betg sclerì quellas vinavant. Sco quai che la Polizia chantunala dal Grischun ha constatà la sonda saira, sa tractavi d'ina gruppaziun da la dretga organisada ordaifer il chantun. La Polizia chantunala ha ordinà da giuditgar la situaziun al lieu cun agid d'ina cumparsa deescalatorica e sch'i fa da basegn far controllas da persunas. L'occurrenza è stada ruassaivla senza incaps. Plinavant n'han ins betg pudì constatar insatge relevant per il dretg penal.»
Original:
«Am Samstag, 18. April 2026 fand in Thusis in der sog. Karbidhalle ein Musikkonzert statt. Die Halle wurde beim Eigentümer angemietet, welcher die üblichen Hinweise zur Mieterschaft hatte und diese nicht weiter abklärte. Wie die Kantonspolizei Graubünden am Samstagabend feststellte, handelte es sich um eine ausserkantonal organisierte rechtslastige Gruppierung.
Die Kantonspolizei hat angeordnet, die Situation vor Ort mittels deeskalierendem Auftritt zu beurteilen und bei Bedarf standardmässig Personenkontrollen durchzuführen. Die Veranstaltung verlief ohne jegliche Vorkommnisse ruhig. Weiter konnten keine strafrechtlich relevanten Feststellungen gemacht werden.»
60 fin 100 persunas hajan fatg part a l’occurrenza. Tgeninas e sche intginas stettian en connex cun «Blood & Honour» n’ha la polizia betg vulì communitgar.
Co è l'occurrenza stada pussaivla?
L'eveniment saja vegnì annunzià sco anniversari, di il possessur da la Karbidhalle, la Bühler Transport SA. Il possessur haja gì las infurmaziuns usitadas per talas occurrenzas e n’haja betg fatg ulteriuras dumondas. Era la vischnanca da Tusaun n’haja betg savì da l’occurrenza e saja vegnida rendida attenta via las medias socialas.
Nus n’essan betg loschs da quest'occurrenza e na vulain betg vegnir mess en connex cun quella.
A la Bühler Transport SA na fetschia la vischnanca naginas renfatschas, or da vista da Tusaun saja il lieu da l’occurrenza casualitad. Per analisar la saira ed evitar en futur talas occurrenzas a Tusaun saja la vischnanca en contact cun il possessur da la Karbidhalle e la Polizia chantunala. Quai na saja dentant betg simpel, concluda Remi Crameri, cunzunt or da vista giuridica.
RTR Magazin 17:00
