Las cifras da visitaders e visitadras da la Viamala restian constantas tar radund 60'000 persunas per stagiun. Il fanadur bletsch da quest’on n'ha gieu naginas consequenzas negativas sin las cifras da visitaders e visitadras da la chavorgia, di il maina gestiun Lars Dünner. Anzi, cun quai che blers hajan gia gì cudeschà lur vacanzas en il Grischun saja l'aura bletscha plitost stada en favur da la Viamala. Tar trid’aura saja la glieud plitost vegnida a visitar la chavorgia enstagl dad ir a viandar u sin il bike, uschia ch'er il fanadur saja stà in bun mais, di Lars Dünner. Er persunalmain saja el fitg cuntent cun la stagiun. Igl haja dà nagins eveniments extraordinaris u incaps – tut haja funcziunà sco ch'i duess. Quai er grazia a ses bun team.
Jau sun vegnì mintga di cun in surrir a la lavur, i na dà nagut negativ che jau pudess menziunar.
In highlight persunal, che n'ha dentant betg da far cun il manaschi è per Lars Dünner in'observaziun tut speziala. Numnadamain ils chamutschs che vegnian en la chavorgia per sa pavlar. Durant l'enviern e la chavorgia serrada. Munta per il maina gestiun Lars Dünner ch'el fetschia in zic dapli lavur da biro. Ed el haja er temp da planisar e sviluppar ina u l'autra occurrenza speziala en la chavorgia per la proxima stagiun.
La guida scenica da la sera «Viamala Notte» cun Erwin Dirnberger dad Andeer vegnia er il proxim onn puspè a dar. Plinavant è planisà in’occurrenza culturala cun Gian Rupf e Volker Ranisch.