Curt suenter il temp da corona ha Tanja Cadisch scuvrì sia passiun per la lavur cun arschiglia. Ensemen cun la possessura dal «Atelier de Mosaique» Silvia Zuberbühler han ellas decidì da porscher curs d'arschiglia. L'idea è però cunzunt vegnida da la clientella.
Noss clients han adina puspè dumandà sche nus pudessan mussar co ch'ins fa rauba d'arschiglia.
Art d'arschiglia dal «Atelier de Mosaique»
-
Bild 1 von 3. Dunnas d'arischglia. Bildquelle: RTR.
-
Bild 2 von 3. Chauras d'arschiglia. Bildquelle: RTR.
-
Bild 3 von 3. Cuppa d'arschiglia. Bildquelle: RTR.
En la butia a Cuira ha mintgin e mintgina la pussaivladad d'emprender la lavur cun arschiglia. Tanja Cadisch ha gia fatg curs cun uffants ch'eran là cun la mamma, cun giuvnas che vulevan passentar ina bella saira cun amias u cun dunnas pensiunadas ch'eran a la tschertga d'in nov hobi creativ. Er umens sa participeschan tranteren, quai però in toc pli pauc. Pertge, saja grev da dir.
Forsa ch'ils umens n'han betg uschè grond plaschair vi da la lavur d'arschiglia, perquai che arschiglia è insatge lom e dunnas èn pli «lomas».
Durant il lavuratori po mintgin e mintgina far quai ch'el ha gust. Vaschella, decoraziuns per chandailas u era figuras ed animals. Il pli savens vulan ils participants e las participantas far cuppins, quai che na vul betg dir che cuppins sajan il pli simpel da far. Igl è simplamain l'emprim che vegn endament a la glieud sch'i pensan vi dal far sez insatge ord d'arschiglia.
Mintgatant cumenz'ins cun insatge ed a la fin datti ina dal tuttafatg autra chaussa.
Atelier de Mosaique
-
Bild 1 von 3. Tanja Cadisch. Bildquelle: RTR.
-
Bild 2 von 3. Plazzas da lavur. Bildquelle: RTR.
-
Bild 3 von 3. Arschiglia elavurada. Bildquelle: RTR.
Il bun vi dad arschiglia saja ch'igl è in material fitg engraziaivel. Ins po adina puspè elavurar el, agiuntar u prender davent material. Ultra da quai saja la lavur adina fitg meditativa, mintgatant er in zic strapatschusa cun quai ch'ins lavura adina fitg concentrà.
Per mai è la lavur cun arschiglia mintgatant perfin in zic terapeutica.