Giachen Caduff ha en ils prest 40 onns ch'el ha lavurà sco cussegliader da vischnanca per l'Uffizi chantunal da vischnancas vis divers chanzlists e chanzlistas ed ha gì envista en bleras vischnancas. Cun las fusiuns ed uschia la redimensiun da passa 200 vischancas giu sin ussa 100 vischnancas saja era creschida la professiunalitad da las chanzlias. E cun surdar tschertas lavurs, sco per exempel ils uffizis da taglia e civil, saja era svanida in pau la complexitad. Quai na munta dentant insumma betg che la lavura saja vegnida pli pauca, resumescha Caduff.
Chanzlist en ina u l'autra vischnanca fiss stà interssant.
Avant curt è Giachen Caduff ì en pensiun. En il discurs cun RTR ha el era raquintà che la lavur d'in chanzlist saja fitg attractiva, per el ina da las lavurs las pli attractivas en las regiuns. Tuttina n'ha el mai fatg la midada dal chantun vi en ina chanzlia communala. I n'haja betg vulì esser ord pliras raschuns.
Ils temps sa midan
Insatge saja sa midà ferm en las chanzlias communalas en quels 40 onns, raquinta Caduff. D'ina vart quant vastas che las lavurs èn, «In chanzlist u ina chanzlista ha da savair da tut insatge», il medem mument sajan las diversas lavurs e tut las leschas adina pli cumplexas. Uschia dovria era spezialists e spezialistas, raquinta Caduff. En quests cass saja lura l'uffizi da vischnancas savens l'agid.
