I saja fitg donn ch'il promotur d'innovaziun InnoQube haja stuì serrar sias portas e quai suenter gnanc dus onns, di Lukas Peter ch'è manader da l'institut d’entrepreneurship a la Scola auta spezialisada FHGR. Il Grischun dovria numnadamain innovaziun. In nov studi da la UBS mussia cleramain ch’il chantun Grischun saja sin il terz davos plaz sch'i giaja per l’attractivitad d'attrair start-ups, pia fatschentas novas cun ideas innovativas. Mo il Vallais ed il chantun Giura èn anc mendras. Ils motivs sajan clers, declera Lukas Peter. Facturs sco accessibladad e cuntanschibladad hajan ina gronda influenza.
Cuira n'è betg Turitg cun sias scolas autas spezialisadas e las universitads. In lieu sco Turitg saja optimal per chaus creativs ed innovativs. Sper las universitads dettia er ils concerns da tecnologia gronds, sco Google, Microsoft u Meta. Quels porschian era programs per start-ups. Uschia regia in ecosistem fitg fritgaivel.
Universitads, promoturs e programs spezials per chaus innovativs – quai è fitg bun per in ecosistem fritgaivel.
La furmla magica per in bun ecosistem: talents, promoturas, interpresas etablidas ed investurs. Tut giaja in en l’auter e sch'in actur manchia, lura saja grev da promover innovaziun, uschia di Lukas Peter. Quai saja er stada ina da las grondas sfidas da l'InnoQube ch'ha stuì serrar sias portas. Avant sia avertura vegniva discurrì d'in Silicon Valley 2.0 e ch’il gigant da tecnologia Microsoft vegnia a Cuira.
Ins po anc porscher uschè in bel biro, sche las finanzas mancan lura n'èsi betg pussaivel da sustegnair ils start-ups.
Co statti ussa cun l'innovaziun en il chantun Grischun?
Il Grischun ha forsa nagins gigants da tecnologia, dentant dettia era en il Grischun interpresas da num e da pum sco per exempel ina Hamilton u ina Integra ch’èn interessadas vi da novs talents ed ideas innovativas. Er qua dettia promoturs che porschian maun a fatschentas giuvnas, e quai cun success. In da quels è il Technoparc a Landquart, che vegn sustegnì finanzialmain dal chantun. In’auter promotur è a Schluein ed anc in auter vegn gist construì a La Punt, l'InnHub. Quai saja gia fitg bun per promover l’innovaziun en il chantun. Dentant, potenzial ensi vers dettia tuttina, constatescha Lukas Peter.
I dovra dapli chapital finanzial per start-ups. Saja quai dal chantun ubain dad investurs. Quai è il benzin per interpresas giuvnas.
Cumpareglià cun auters chantuns svizzers, haja il Grischun in grond avantatg, numnadamain la forza finanziala. Quella è tenor il studi da la UBS gronda. Uss giaja mo anc da guardar co nizzegiar quella forza finanziala per crear in ecosistem pli attractiv per start-ups e promoturs per uschia daventar pli innovativ.
Technopark a Landquart: «I gira bain»
In da quels promoturs d'innovaziun è il Technopark Grischun a Landquart. Quel tutga a l’associaziun naziunala Technopark e vegn sustegnì dal chantun sco era d'ulteriurs partenaris. Pia LA adressa per interpresas giuvnas en il sectur da tecnologia.
«Twice the Peak», conquistar dus piz, uschia ha num il motto dal Technopark Grischun. In piz stat per las muntognas e l’auter piz duai simbolisar il sustegn per ils start-ups, sco Eugen Arpagaus il CEO declera.
Nus gidain ils start-ups sin il piz dal success. Ir a pe ston els sez, suar ston els sez. Cun noss agid na crodan els betg uschè spert.
En il Technopark chattan start-ups ina plazza da lavur, in barat cun auters start-ups ed era sustegn da fatschentas gia etablidas. E sco Eugen Arpagaus raquinta, vegn quella purschida dumandada ed era duvrada. Il Technopark Grischun datti dapi l'onn 2021. La finamira da lezzas uras: aifer tschintg onns ina chasa plaina cun passa 40 persunas. Questa finamira han els spert stuì adattar. Uss sajan els gia suenter trais onns plains cun passa 70 persunas.
Planisà avevan nus per 40 persunas, ussa avain nus gia suenter trais onns 70 persunas. Nus essan pia fitg cuntents.
Actualmain promova il Technopark Grischun 15 start-ups en il sectur da tecnologia. Blers da quels èn da la regiun. Dentant dettia era start-ups da la Bassa che han chattà la via en il Grischun. In bun exempel saja la fatschenta QE ScRL. Quest start-up producescha sensurs che mesiran la qualitad d’aria en ina stanza. Glischa il sensur oransch ubain cotschen èsi temp d'avrir la fanestra. Il start-up QE ScRL para d'avair success, el ha gudagnà avant dus onns in premi d’innovaziun. Quai er grazia al Technopark Grischun che collia start-ups cun fatschentas gia etablidas. Quellas lavurian enfin 30 dis ad onn en favur dals start-ups. E perquai saja impurtant che l’idea d’ina interpresa giuvna giaja er a prà cun la purschida da las interpresas etablidas.
Sch’in start-up vul producir in product d’electronica lura è quai in avantatg perquai ch'i dat qua en il Grischun interpresas che pon producir quai. Las vias èn curtas.
Sulet pervia da la bell’aura na vegnia nagin innovatur en il Grischun, di Eugen Arpagaus. Perquai saja impurtant d’accentuar ils avantatgs ch’il chantun sez, ils promoturs ed era las fatschentas porschian per start-ups ed er da mussar quels avantatgs.