Pervia da sfidas d'occupar il center da start-ups cun interpresas giuvna avra il Technopark Grischun a Landquart pli tard che previs. Uss dentant è el avert uffizialmain. Dapi l'entschatta dal 2021 sajan nov interpresas cun 16 collavuraturas e collavuraturs sa chasadas a Landquart. Ils responsabels discurran d'in start da success.
«Il chantun vul vegnir sin la charta da start-ups»
Il Technopark Grischun saja impurtant per porscher in lieu nua che interpresas giuvnas pon sa chasar, sa colliar, dar vinavant savida, uschia descriva il minister d'economia Marcus Caduff l'impurtanza economica per il chantun. La finamira saja d'ina vart ch'i dettia in lieu adattà per interpresas giuvnas ma er che ina u l'autra interpresa possia crescher ad in grond player en l'economia grischuna che porta er substrat da taglia. Ma quai dovria sper pazienza ed er daners. Uschia investescha il chantun mintg'onn 250'000 francs en il Technopark. En tut porscha il Technopark plaz per da quai da 40-45 plazzas da lavur.
Las ultimas emnas hai dà moviment en il sectur d'economia dal Grischun. Uschia han diversas firmas sco la Gritec, Integra Bioscience u er la Hamilton bajegià ora l'areal. Sper quai ha er cumenzà la construcziun da l'InnoQube a Cuira, in center d'innovaziun. Tenor il minister d'economia Marcus Caduff saja il Technopark ina purschida cumplementara – dapli ch'i detti a pli fritgaivel ch'i saja per l'economia.
Pli attractiv
Cun il svilup da las purschidas per start-ups vegnia il Grischun pli attractiv per interpresas giuvnas, di Sebastian Früh da la Scol'auta spezialisada dal Grischun, FHGR. Entras la cumbinaziun d'in ambient creativ en in chantun turisticamain attractiv, sper'ins che persunas e fatschentas innovativas e creativas vegnian en il Grischun. L'idea da purschidas per start-ups n'è betg nova, en cumparegliaziun cun la Svizra sa chattia il Grischun en il bun champ central, di l'expert da la FHGR. Il svilup vegnia rinforzà en connex cun la strategia d'innovaziun dal chantun. Ins haja percurschì ch'i dovria ussa quels posts da consultaziun.
