È la cultura la nova naiv? Questa dumonda respunda Kaspar Howald spert cun in Na. En il futur damanaivel na vegnan ils giasts betg en il Grischun pervia dad operas, mabain pervia da las pendicularas. Cler ch'ils giasts visitan era events culturals, ma quai è tenor il manader dal project «Grischun cultura» betg il motiv principal per la visita. La cultura possia dentant esser in nov motor per il turissem grischun.
La purschida datti en il Grischun, e quella vegn era duvrada. Tenor Kaspar Howald fa la cumbinaziun da purschidas ora il success. E là duess vegnir mess dapli paisa sin la cultura. Era las destinaziuns turisticas han là d’avair dapli curaschi da far reclama. Il manader da «Grischun cultura» na po dentant betg s'imaginar che giasts che vegnan per la cultura empleneschan las stanzas dals hotels durant la stagiun morta.
Stagiun auta d’enviern, primavaira, stad ed atun
La stagiun d’enviern è la pli ferma en il Grischun, vi da quai na laschan ils turistichers e las turisticras nagin dubi. Ch’il turissem en il Grischun vegnia in da tut onn, quai saja realistic – dentant cun intginas pausas. La primavaira per exempel serran blers hotels per intginas emnas, uschia che las collavuraturas ed ils collavuraturs han era vacanzas. E suenter l’enviern van ils turists e las turistas plitost en il sid nua ch'igl è chaud – e quai n'è en il Grischun betg il cas.
-
Bild 1 von 4. En il Grischun è la cultura schon preschenta, per exempel cun Origen a Mulegns ... Bildquelle: Keystone.
-
Bild 2 von 4. ... il muzeum a Susch ... Bildquelle: Keystone.
-
Bild 3 von 4. ... il museum da Kirchner a Tavau .... Bildquelle: Keystone.
-
Bild 4 von 4. ... u cun il museum da Segantini a San Murezzan. Quai èn intgins exempels. Bildquelle: Keystone.
La stad è uss era schon ina buna stagiun pervia da las pussaivladads da far sport, ed era perquai ch'i n'è betg ina chalur sco en auters lieus. En questa stagiun fan tenor la manadra da segments tar Grischun Vacanzas Manuela Ruinatscha las catastrofas da natira quitads. En ils ultims onns hai dà avunda exempels. La stagiun d’atun haja lura era schanzas – tut tenor sco che l’aura è.
Tut en tut saja ina stagiun auta da tut onn realistica, quai vesa era il sviluppader da products tar Grischun Vacanzas Marc Wootdli uschia. Dentant betg tut l’onn en il medem lieu, cunquai che las regiuns grischunas sa chattan sin differentas autezzas e lubeschan uschia als giasts da sa render sur l'onn en divers lieus. Quai evitass era l'uschenumnà overturissem, pia che memia blera glieud è il medem mument en il medem lieu, manegia Marc Woodtli.
Sin il mund datti differents exempels nua ch'i dat gia memia bler turissem. Per exempel a Venezia nua che quasi nagins indigens abitan pli pervia dal turissem. En il Grischun datti quai mo punctual. Intgins dis ad onn èn il Lai la Cauma u ils lais en l'Engiadin’Ota fitg plains. Sco destinaziun possian ins empruvar da manar ils giasts. Da manar els cun reclama a lieus che n'èn betg emplenids. Mintgatant stoppian ins era lavurar cun scumonds, surtut sch'i pertutga la natira. Per exempel cun serrar vias en ils guauds, u mo lubir da far fieus en lieus fixads.
Or da l'archiv: