In, dus clics ed in pèr pleds sin plattafurmas sco chatGPT u Gemini ed ins survegn il maletg ch'ins ha tschertgà. L'intelligenza artifiziala generescha en paucas secundas illustraziuns. Dovri uschia insumma anc insatgi che dissegna sez quellas cun bler temp e lavur?
Digitalisaziun levgescha la lavur
Pli baud eran in rispli u in penel e palpiri ils guaffens da lavur d'ina illustratura u d'in illustratur. Ozendi dovra Ueli Pfister – illustratur independent dapi bain 30 onns – quels plitost mo pli per sasez. Per lavurs d'incumbensa dovra el uss per regla il tablet e la penna che appartegn a quel. La digitalisaziun levgeschia uschia ina part da sia lavur. Pli baud ha el dissegnà ses maletgs, lura stuì fotocopiar u scannar quel. Quai funcziuna uss tut a moda digitala – sin il tablet vegnan las illustraziuns directamain midà en pixels u vecturs. Era il colurar è ussa bler pli simpel: Digitalmain pon ins dar mintgamai il medem tun da colur ad ina seria da maletgs ed ha era uschiglio dapli pussaivladads.
Intginas ovras da Ueli Pfister
-
Bild 1 von 4. L'illustratur Ueli Pfister ha ditg dissegnà il comic «Little Cowboy». Bildquelle: MAD.
-
Bild 2 von 4. In maletg or dal cudesch illustrà d'uffants «Dino und Donny im Frühling». Bildquelle: MAD.
-
Bild 3 von 4. In dissegn scientific d'ina nursa che Ueli Pfister ha malegia sin ses tablet. Bildquelle: MAD.
-
Bild 4 von 4. In'illustraziun che Ueli Pfister ha fatg sin incumbensa. Bildquelle: MAD.
A l'intelligenza artifiziala manca insatge impurtant
Ozendi vegn l'intelligenza artifiziala er duvrada en il sectur d'illustraziuns. Questas agenturas che lavuran cun illustraziuns creadas dad IA na sajan betg prontas da pajar il pretsch d'illustraziuns professiunalas – IA lavura gea quasi gratuitamain ed alura anc bler pli svelt.
L'intelligenza artifiziala saja uschia per part ina concurrenta per illustraturas ed illustraturs – dentant mo, sch'i sa tracta da crear simpels dissegns e maletgs ch'èn gia vegnids fatgs bleras giadas e ch'ins po chattar en l'internet.
ChatGPT ed autras plattafurmas da IA sa refereschan sin quai ch'ellas èn vegni pervesidas cun tut: quels maletgs ch'ellas han – ditg sincer – engulà.
Per crear maletgs u fotografias rimnan quellas bancas da datas – sco ChatGPT u Gemini – infurmaziuns or d'illustraziuns en l'internet. Quellas èn dentant vegnidas creadas d'umans ed èn uschia, tenor Ueli Pfister, vegnidas enguladas.
Ma ina chaussa, quella manchi a l'IA: empatia. Quai na possian las plattafurmas anc betg dar a lur illustraziuns. Ed uschè ditg dovri perquai era illustraturs ed illustraturas.