La GiuRu è vegnida fundada avant bunamain 35 onns – e tuttina ha Flurin Schlegel gì il sentiment, che la nova suprastanza da l'uniun haja prest stuì cumenzar da nov l'onn passà. «Nus n'avevan nagina glista, da tgi che fa part da la GiuRu. E l'anteriura suprastanza ans ha sustegnì bain.» Ed el agiunta: «Quai che pertutga la cuminanza – qua avain nus stuì cumenzar praticamain tar nulla.»
Els tschintg hajan gì pauca experientscha a l'entschatta. L'emprim onn saja stà in onn da dumondas a d'emprender novas chaussas. Sco in dals emprims events suenter dus onns han els organisà in «Day Dance» al Lai da Turitg. «Avant che nus avain organisà quai, n'avain nus gì nagina idea co ch'ins organisescha in event u co che quai funcziuna cun il sponsoring», uschia Flurin Schlegel. «Nus avain lura simplamain empruvà, ed i ha funcziunà tip top.»
Cun motivaziun vid novas sfidas
Il «sponsoring» saja però insatge ch'haja funcziunà bain a partir da l'entschatta, uschia Flurin Schlegel. La GiuRu survegn numnadamain sustegn finanzial da la Lia Rumantscha. Uschia po l'uniun duvrar quels daners per prender a fit locals per festas u per pajar artistas ed artists che dattan in concert.
Grazia a lur motivaziun, a las festas organisadas ed als inscunters en la Bassa saja il dumber da commembers s'augmentà sin enturn 30 fin 40, sco che Flurin Schlegel stima. «Cumenzà avain nus cun var 10 commembers ed ussa essan nus tar 30, 40 commembers e commembras», di il cassier, ed agiunta: «Per mai è quai tip top.»
Proxima occurrenza gronda: Openair rumantsch
Cun quest nov sustegn sa legra Flurin Schlegel era spezialmain sin «l'Openair rumantsch» ils 11 da fanadur – ina festa al Polenta7000 a Cuira. Tenor il cassier è quai la pli gronda festa da la GiuRu dapi ch'els han surprendì la suprastanza. Il svilup positiv sa mussa pli e pli, di el.
Nus avain uss ina gruppa da WhatsApp e noss account dad Instagram – ed era sche nus n'avain betg tants followers, vegn quai schon, pass per pass.
La suprastanza haja savì da bell'entschatta ch'i vegn ad esser ina via lunga. Tenor il cassier dovri anc bler dapli commembers – surtut giuvens e giuvnas, che vulan organisar sez insatge. Ils commembers da la suprastanza hajan stuì vesair, ch'els sez n'han plitost pauc temp actualmain.
Ord l'archiv
Sfidas dad organisar e mobilisar persunas è in pau in fil cotschen tar la GiuRu - almain sch'i va per ils davos pèr onns. Quai mussa er questa contribuziun dal giubileum da 30 onns da l'organisaziun.