Nagin n'avess quintà oravant cun in resultat talmain cler. Ins badava en discussiuns cun delegadas e delegads ch'i pudess daventar stretg per la presidenta en uffizi cun in copresidi cun Bernard Maissen. Il resultat cun be duas vuschs per els dus è tuttina stà ina schleppa.
Surprendent è dentant stà che la lavur prestada d'Urezza Famos n'è betg vegnida crititgada en general. Unicamain dispità è stà ch'ins n'ha betg resguardà ils tschentaments ed ch'ins ha decidì fitg svelt senza pussibilitar ina discussiun. Ed il punct decisiv è probablamain stà il «tam tam» pertutgant il secretari general. Suenter quai n’hai interessà nagin sch'igl è in Sursilvan u in Engiadinais ed era betg sch'el è catolic u refurmà. Uschè unida sco uss è la Rumantschia darar stada – en sasez insatge bel.
Armon Schlegel
Redactur Engiadina
