La Lia Rumantscha va tras temps turbulents. La suprastanza da la Lia Rumantscha ha relaschà dad in mument sin l'auter il secretari general Markus Solinger. Be otg dis pli tard la segunda surpraisa: quest post na vegn betg remplazzà.
La Lia duai en il futur vegnir manada d'in trio. La moda e maniera co la Lia Rumantscha ha infurmà davart tut questas midadas chaschuna discussiuns. Ed uss en vista a la radunanza generala cun l'elecziun dal nov presidi vegn la critica pli detagliada – e quai era da vart prominenta.
Dad ina vart vegnan quitads palais, quai per exempel da Rico Valär, professer per litteratura e cultura rumantscha a l'Universitad da Turitg. Valär di che la Lia saja da princip en ina buna fasa. Las co-presidentas hajan purtà nov vent ed ina nova dinamica a l'organisaziun. La relaschada dal secretari general e la preschentaziun a curta vista da la reorganisaziun chaschuna dentant dumondas tar el.
Per mai èsi in pau difficil da crear ina situaziun da «tabula rasa» e da metter tuts davant fatgs accumplids uschè curt avant ina radunanza da delegadas e delegads, er en vista ch'i dat u in nov copresidi u in nov president.
Rico Valär metta en dumonda sch'igl è il dretg mument da far ina tala midada structurala gista avant la radunanza da delegadas e delegads. Da l'autra vart crititgescha era la gruppa rumantscha dal Cussegl grond la situaziun. La maniera da communicaziun na saja betg stada buna, di Aita Biert. Ma era Gian Michael di ch'i manchia in concept ed ina strategia e surtut la transparenza.
Midar ils statuts u mo ina decisiun da persunal?
Plinavant vegni mess en dumonda sche la Lia Rumantscha ha insumma la cumpetenza da far quest pass senza midar ils statuts e cun quai senza involvar las delegadas ed ils delegads da la Lia.
Er ils responsabels en chasa rumantscha èn sa fatschentads cun questas dumondas. Lur conclusiun – dumondas da persunal èn chaussa da la suprastanza.
En connex cun ils statuts dovria quai dentant schon in pèr adattaziuns. Quai n'haja dentant betg prioritad, di la presidenta Urezza Famos. Pli impurtanta saja ussa la restructuraziun. Che questa midada da structuras na saja betg vegnida communitgada bain na lascha ella betg valair.
Na, jau crai che nus avain fatg l’infurmaziun correcta, nus avain ditg tge ch'è il fatg. Igl è bain cler ch'ins na po betg integrar 65 delegads e delegadas en in process sco quel.
Il process da la restructuraziun haja durà nov mais, e la suprastanza haja integrà bleras vuschs internas ed externas. Quel process haja la Lia fatg transparent, documentà e protocollà, di Urezza Famos. I dettia respostas profundas per dumondas profundas – ma ins na giaja betg en il public cun uschè in process, quai na fetschia la Lia Rumantscha betg e quai na fetschia er betg in'autra firma.
L'elecziun dal nov presidi da la Lia Rumantscha cun las delegadas ed ils delegads a la radunanza generala ha lieu questa sonda, ils 20 zercladur.