Suenter che Gianna Luzio è vegnida elegida sco nova directura da l’Uffizi federal da communicaziun ha ella demissiunà sco copresidenta da la Lia Rumantscha. Dapi l’october 2025 maina l’ulteriura copresidenta, Urezza Famos, ad interim suletta ils affars da la Lia Rumantscha. Ussa vai per eleger in nov presidi. Duas candidaturas stattan a disposiziun.
Urezza Famos e Bernard Maissen per in copresidi
Per in copresidi candidescha la presidenta actuala, Urezza Famos, ensemen cun Bernard Maissen. Urezza Famos è dapi il 2022 en uffizi ed ha presidià l'organisaziun ensemen cun Gianna Luzio fin che lezza è vegnida elegida l'onn passà sco nova directura da l'Uffizi federal da communicaziun. Famos è cussegliadra d'interpresas e cultura ed editura.
Ses cuncandidat Bernard Maissen ha studegià germanistica, istorgia e schurnalissem a l'universitad da Friburg ed ha lura lavurà en diversas funcziuns sco schurnalist e schefredactur. Avant ch'el ha midà tar il BAKOM è el stà schefredactur e commember da la direcziun da l'Agentura da novitads svizra SDA. Dal 2013 fin il 2018 è el er stà commember da la cumissiun da medias federala EMEK.
Or da l'archiv:
Chasper Sarott candidescha per in presidi singul
Per il presidi sco candidat sulet sa metta a disposiziun Chasper Sarott. El è stà diplomat ed ambassadur en differents pajais sco il Libanon, la Pologna, il Madagascar e la Republica democratica dal Congo.
Dapi l'onn passà è Chasper Sarott vicedirectur e schef da persunal dal Departament federal dals affars exteriurs.
Elecziun a la radunanza da delegads
En il rom da la proxima radunanza da delegadas e delegads, ils 20 da zercladur 2026, ha lieu l’elecziun substituiva dal presidi da la Lia Rumantscha.
Ultra da quai elegia la radunanza er in nov suprastant. L'Uniun Rumantscha Grischun Central propona Leo Thomann sco represchentant e successur da Patric Vincenz. Leo Thomann è selvicultur pensiunà, anteriur president communal dal Surses ed actual president da l'Uniun rumantscha da Surmeir.
Tscherna na s’haja ni fixada sin schlattaina ni sin la derivanza
Fin ils 31 da mars han persunas interessadas pudì s’annunziar per il presidi. Ni la schlattaina ni la derivanza da las candidatas u dals candidats pussaivels sajan decisivas tenor la cumissiun da tscherna: «Nus essan averts per tut tgi ch’è interessà. L’unica premissa è che candidatas u candidats pussaivels n’èn betg engaschads a medem temp en ina funcziun u in'instituziun che pudess chaschunar conflicts dad interess», di Toni Vinzens.
Ina tala posiziun saja cunzunt interessanta per persunas che vulessan influenzar u almain esser part dal svilup futur da la lingua e cultura rumantscha. Quant grond ch’il pensum saja la fin finala, n'ha Toni Vinzens betg pudì dir cun segirezza. «Quai dependa era adina in zic co il program guarda ora, ma i dat segir enturn otg sesidas ad onn. Ultra da quai sto ina presidenta u in president er anc s’inscuntrar cun auters gremis e planisar in zic temp per preparativas e differentas lavurs suenter las sesidas.»